Bas júlde - 5 mln teńge: Astanada halyqaralyq aqyndar aıtysy ótedi
Aqyndar aıtysy týraly aıtylǵan Astanadaǵy baspasóz máslıhatyna búgin QR Mádenıet jáne sport mınıstri Arystanbek Muhamedıuly, Qazaqstan Jazýshylar odaǵynyń tóraǵasy Ulyqbek Esdáýlet, Qazaqstannyń halyq aqyny Ásııa Berkenova jáne Qazaqstannyń eńbek sińirgen qaıratkeri Júrsin Erman men «Altyn dombyra» syılyǵynyń eki márte ıegeri Muhtar Nııazov qatysty.
«Elorda óleń-jyrǵa bólener eleýli oqıǵanyń aldynda turmyz. Sebebi, Astananyń 20 jyldyǵy aıasynda ótetin halyqaralyq aqyndar aıtysyna Mońǵolııa, Qyrǵyz Respýblıkasy men Qytaı Halyq Respýblıkasynan aqyndar keledi. Birneshe jyl buryn Júrsin Erman aǵamyz mundaı aýqymdaǵy aıtysty ótkizgen bolatyn. Bul jolǵysy da keń aýqymdy aıtys bolaıyn dep tur», - dedi Arystanbek Muhamedıuly.
Halyqaralyq aqyndar aıtysy Astananyń 20 jyldyǵyna arnalyp otyr. Aıtysqa Mınathan Ularbek, Jámıǵa Dáýletqyzy (QHR), Aıdos Rashat, Amanjol Qýantqan (Mońǵolııa), Asylbek Maratov, Ýsýpbek Ýýlý Mýndýzbek (Qyrǵyz Respýblıkasy) pen Qazaqstannan Rınat Zaıtov, Erkebulan Qaınazarov, Serik Qoıshyǵulov, Birjan Baıtýov, Muhtar Nııazov qatysady.
Aıtysqa Memlekettik syılyqtyń laýreaty Ulyqbek Esdáýlet (ádil qazylar alqasynyń tóraǵasy), professor Dıhan Qamzabekuly, tarıh ǵylymynyń doktory, Túrkııanyń Mımar Sınan kórkem óner ýnıversıtetiniń professory Ábdiýaqap Qara, aqyn, jazýshy Shynaı Rahmetuly (Mońǵolııa), aıtys aqyny Ásııa Berkenova tórelik etedi. Jyr dodasynda bas júlde ıegerine 5 mln teńge tabystalsa, birinshi orynǵa 2,5 mln teńge, ekinshi oryn 2 mln teńge, úshinshi orynǵa (2 adam) mıllıon teńgeden beriledi.