Bas sanıtar dáriger: Shekteýmen ne shekteýsiz ómir súrý astanalyqtardyń ózine baılanysty
«Osy jyldyń basynan beri elordada koronavırýstyq ınfektsııamen syrqattaný boıynsha epıdemıologııalyq jaǵdaı asa kúrdeli bolyp otyr. Turaqtaný úrdisine qaramastan tirkeý joǵary deńgeıde qalýda. Tek bir táýlik ishinde 822 rastalǵan jaǵdaı tirkeldi. 2022 jyldyń basynan bastap 79 494 jaǵdaı tirkelgen edi. Bul jalpy Qazaqstan Respýblıkasy boıynsha barlyq tirkelgen jaǵdaılardyń 45 paıyzyn quraıdy», - dedi ol.
Osy oraıda bas sanıtar dáriger Memleket basshysynyń 2022 jylǵy 21 qańtardaǵy tapsyrmalaryn iske asyrý maqsatynda vedomstvoaralyq komıssııa otyrysynda bıznes sýbektileri úshin shekteýlerdi jeńildetý túrleri qaralyp, maquldanǵanyn aıtady.
«Osylaısha, Nur-Sultan qalasynyń bas sanıtar dárigeriniń 2022 jylǵy 1 aqpandaǵy № 3 qaýlysy qabyldandy. Onda engizilgen ózgeristerge sáıkes, qala qaı aımaqta ornalasqanyna qaramastan, kelýshiler men barlyq personalda «jasyl» mártebe bolǵan jaǵdaıda Ashyq jobasyna qatysýshy kelesi obektilerde shekteýsiz qyzmet etýge ruqsat etiledi: SOO, saýda úıleri men saýda jelileri, basseınder, marafondar, kórmeler, karaoke, dinı obektiler. Bul estelik, saltanatty is-sharalarǵa, konferentsııalarǵa, forýmdarǵa da qatysty. Al kelesi obektilerge «kók» jáne «jasyl» mártebe ıelerine kirý ruqsat etilgendikten shekteýlermen jumys isteıdi: teatrlar, kınoteatrlar, okeanarıýmdar, bılıard, kompıýterlik klýbtar, lotereıa klýbtary, býkmekerlik keńseler, JOO, kolledjder, orta bilim berý uıymdary, qoǵamdyq tamaqtaný obektileri», - dedi Sarhat Beısenova.
Onyń atap ótýinshe, elordanyń «qyzyl» aımaqta ornalasqandyǵyn eskere otyryp, krıterıılerge sáıkes, balalardy saýyqtyrý ortalyqtary, teatrlar, okeanarıýmdar, bılıard bólmeleri, boýlıngter, tsırkter, meıramhanalar, kafeler, kınoteatrlar syıymdylyǵy 60 paıyzǵa deıin jumys isteýge quqyly.
«Pandemııa kezeńinde bıznestiń barlyq salalarynda mundaı karantındik jeńildetý sharalary áli de bolǵan joq. Bul bıznestiń belgilengen qaýipsiz jumys algorıtmin oryndaýǵa degen erekshe jaýapkershiligin, senimi men mindettemesin júkteıdi», - dedi ol.