Bas prokýror orynbasary Qaırat Satybaldynyń ótinishi týraly: Minezdemeleri eskeriledi

<p>Bas prokýrordyń orynbasary Áset Shyndalıev asa iri kólemde qarajat jymqyrdy degen aıyppen 6 jylǵa sottalǵan Qaırat Satybaldynyń ózine taǵaıyndalǵan jazany jeńildetý týraly ótinish berýine baılanysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Qazaqtelekom» jáne «Kóliktik servıs ortalyǵy» kompanııalarynyń qarajatyn jymqyrdy degen kúdikpen ustalyp, 6 jylǵa sottalǵan Qaırat Satybaldy Qylmystyq-atqarý júıesiniń Shyǵys Qazaqstandaǵy departamentine merziminen buryn shartty túrde bosatý týraly ótinish joldaǵany týraly málimet taraǵan edi.

Astanadaǵy adam quqyqtaryn qorǵaý zańnamasyn jetildirýge arnalǵan halyqaralyq konferentsııa barysynda jýrnalıster Bas prokýrordyń orynbasarynan osy málimet týraly pikirin surady.

«Kez kelgen sottalǵan azamattyń merziminen buryn bosatý nemese jaza túrin aýystyrý týraly ótinish túsirýge quqyǵy bar. Biraq biraz qylmystar boıynsha ondaı quqyqty qoldanýǵa tyıym salynady. Atap aıtsaq, terrorıstik, ekstremıstik, jemqorlyq baptary boıynsha sottalǵandar jazadan bosatylmaıdy. Bul atalǵandardyń bárine emes, biraq shekteýler bar. Qaırat Satybaldyǵa kelsek, ondaı aryz berýge quqyǵy bar. Ol aryz sotta qaralady. Sot sheshimi qandaı bolatynyn qazir eshkim aıta almaıdy. Ol aryz bergen soń birden bosatady dep te eshkim aıta almaıdy. Protsess bir aıdyń ishinde qaralýy múmkin. Bul jerde sot otyrysy qashan bolatynyna baılanysty. Al otyrystyń qashan ótetinin sot organdarynan bilgenderińiz durys», — dedi Eldos Shyndalıev.

Jýrnalıst Bas prokýrordyń orynbasarynan sot Qaırat Satybaldyny aıypty dep tanyǵan baptar onyń merziminen buryn bosaýyna qanshalyqty kedergi bolatynyn naqtylady.

«Jalpy ol baptar ondaı múmkindik beredi. Biraq jańa da aıtqanymdaı, bul tek onyń quqyǵy. Ol quqyǵyn qanshalyqty qanaǵattandyratynyn sot qaraıdy. Sot qaraǵanda da jazany óteý kezindegi minezdemesi qandaı bolǵanyn, sottalardyń aldyndaǵy minezdemesi qandaı bolǵanyn, sonyń bárin tikeleı, keshendi túrde qaraıdy. Sodan keıin baryp sheshim qabyldaıdy. Bul jerde erekshe aıtý kerek, atalǵan azamat túsirgen ótinishtiń máni merziminen buryn bosatý emes, sot belgilegen jazany ózgertý týraly bolyp otyr», — dedi Bas prokýrordyń orynbasary.