Bas prokýror zańsyz sottalǵan eki adamnyń aqtalýyna bastamashy boldy

ASTANA. QazAqparat - QR Bas prokýrory  Qaırat Qojamjarov zańsyz sottalǵan D. Myrzaqulov pen R. Gabdraýfovaǵa qatysty qylmystyq isterdi toqtatý jóninde QR Joǵarǵy sotynyń aldynda bastamashylyq jasady, dep habarlaıdy QazAqparat vedomstvonyń baspasóz qyzmetine silteme jasap.

D.Myrzaqulovty 2015 jyly Shymkent qalasynyń Ál-Farabı aýdandyq soty iri mólsherde urlyq jasaǵany, sondaı-aq  urlyq jasaýǵa oqtalǵany úshin 3 jyl 6 aıǵa bas bostandyǵynan aıyrǵan.

Bas prokýratýra qylmystyq is materıaldaryn zerdeleýdiń nátıjesinde dáleldemelerdiń oıdan qurastyrylǵanyn, al kinániń dáleldenbegenin anyqtady.

QR Joǵarǵy soty  2018 jylǵy 16 qazanda Bas prokýrordyń ýájderimen tolyǵymen kelisip, D.Myrzaqulovty kinásiz dep tapty.

Atalǵan azamat kolonııada 3 jyl 2 aı 20 kún zańsyz ótkizdi.

Sonymen qatar, Taraz qalalyq soty 2016 jyly R.Gabdraýfovany jol-kólik oqıǵasy bolǵan jerden ketip qalǵany úshin 1 jylǵa bas bostandyǵyn shektep,1 jyl 6 aı merzimge kólik quralyn basqarý quqyǵynan aıyrdy.

QR QK-niń 347-babyna saı, jol apaty bolǵan jerden ketip qalǵany úshin qylmystyq jaýaptylyq aýyr saldarǵa ákep soqqan jaǵdaıda ǵana týyndaıdy.

Bul jaǵdaıda jábirlenýshi aýyrlyǵy ortasha dene jaraqattaryn alǵan.

QR Joǵarǵy sot Bas prokýrordyń narazylyǵyn qanaǵattandyryp, qylmystyq quqyq buzýshylyq quramy bolmaǵandyqtan R.Gabdraýfovaǵa qatysty isti toqtatty.