Bas prokýror: UQShU áskeri Qazaqstanda lańkestikke qarsy operatsııaǵa qatysqan joq

NUR-SULTAN. QazAqparat – Qańtar oqıǵasy kezinde UQShU áskeri lańkestikke qarsy operatsııaǵa qatysqan joq. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

Onyń aıtýynsha, qańtar oqıǵasy kezinde Qazaqstannyń terrıtorııalyq tutastyǵyna qaýip tóndi.

«Bul faktorlar Ujymdyq qaýipsizdik týraly sharttyń 4-babyna sáıkes, UQShU-ǵa múshe elderdiń bitimgerlik kontıngentin tartý úshin negiz boldy. Olardyń basty maqsaty strategııalyq mańyzdaǵy nysandardy qorǵaý boldy. Lańkestikke qarsy operatsııalardy ótkizý kezinde UQShU áskeri qatyspaǵanyn aıryqsha atap ótemin», - dedi Berik Asylov.

Budan buryn habarlanǵandaı, Bas prokýror qańtar oqıǵasy kezinde 11 aımaqta agressıvti toptar zorlyq-zombylyq satysyna ótkenin aıtty.

«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktıvti kúshterdiń arandatýyna boı bermeýge shaqyrdy. Alaıda, birneshe márte sabyr saqtaýǵa shaqyrýǵa qaramastan, qylmystyq jáne radıkaldy elementter belsendi de qatań áreketterge kóshti. 4-shi jáne 5-shi qańtarda azamattar jıyny agressıvti topqa aınalyp, 11 aımaqta zorlyq-zombylyq satysyna ótti», - dedi B. Asylov.