Bas prokýror sotty neden qorǵaý kerektigin aıtty

ASTANA. QazAqparat - Tergeýshilerdiń sýdıalarǵa tikeleı baılanysyna tosqaýyl qoıý kerek. Bul týraly elordada «Qazaqstandaǵy sot bıliginiń táýelsizdigi jáne sot ákimshiligi máseleleri» atty halyqaralyq konferentsııada QR Bas prokýrory Jaqyp Asanov málim etti, dep habarlaıdy QazAqparat.

«Sotty tergeýshilerdiń emotsııasynan, aıyptaýshynyń ekpininen qorǵaýymyz kerek. ıAǵnı sotta adamnyń kinási týraly aldyn ala pikir qalyptaspaýy qajet. Sondyqtan da biz tergeýshilerdiń sýdıalarǵa tikeleı baılanysyna tosqaýyl qoıýǵa tıispiz. Sonymen qatar aldaǵy ýaqytta sýdıalarǵa qylmystyq isterdi emes, tek aıyptaýshy aktilerdi tapsyrý úshin, bul máseleni qazirden bastap qarastyrý kerek. Nege? Sebebi osy qadam adamnyń aıyptylyǵy týraly tergeýshi qurǵan sıpattamany protseske májbúrli túrde engizbeý úshin qajet bolyp tur», - deıdi Bas prokýror.

J. Asanov osy jaǵdaıda prokýror men qorǵaýshy tarapy sotqa materıaldardy protsess barasynda usynatynyn jetkizdi.

«Dál sol jerde materıalǵa baǵa berip, olardy dálelge jatqyzý nemese jatqyzbaý mártebesin aıqyndaý kerek. Bul óz kezeginde taraptardyń básekelestigine yqpal etedi», - dedi Bas prokýror.

Aıta keteıik, Jaqyp Asanov aqtaý úkimderi nege az kezdesetindigin túsindirdi. 

«Tergeýshi is boıynsha materıaldardy jınaıdy jáne ony dálel retinde tanıdy. Al qorǵaýshy jaǵynda mundaı quqyq joq. Bul óz kezeginde taraptardyń básekelestigine yqpal etpeıdi. Sondyqtan derekterdi dálel retinde taný nemese tanymaý tergeýshi men prokýrorǵa emes, sotqa tıesili bolýy kerek», - dedi ol.