Bas prokýror ózin órtep jibergen Rysmanovanyń ápkesin qabyldady
«Búgin Bas prokýror Jaqyp Asanov 18 aryzdanýshyny, onyń ishinde Maıra Rysmanovanyń ápkesi Dánııa Rysmanovany jeke qabyldady. Bas prokýror Rysmanovanyń ápkesine jaqyn týysynyń mezgilsiz qaza tabýyna baılanysty kóńil aıtyp, jerleý rásimine oraı otbasyna járdem kórsetiletindigin atap ótti», - delingen Bas prokýratýra taratqan aqparatta.
Vedomstvo aqparatyna sáıkes, uly E.Ahmetovtiń sottalýyna kelispegen Maıra Rysmanovanyń shaǵymy Bas prokýratýraǵa 2016 jyldyń 28 qarashasynda túsken. Shaǵymdaǵy dálelderdi tekserý úshin sottan qylmystyq is suratyp alynǵan. E.Ahmetov 2015 jyldyń 15 maýsymynda Shý aýdandyq sotynyń úkimimen iri mólsherde esirti zatyn zańsyz saqtaǵany úshin 4,5 jylǵa bas bostandyǵynan aıyrylǵan.
Úkimdi Jambyl oblystyq sotynyń appelıatsııalyq satysy da ózgerissiz qaldyrǵan. Úkimge baılanysty elimizdiń Joǵarǵy sotyna shaǵym jasalmaǵan.
«Aıta keterligi, Rysmanovanyń ulynyń zańsyz sottalýy týraly dálelderi oblystyń polıtsııa qyzmetkerlerine qatysty qozǵalǵan basqa jeti qylmystyq isti tergeý barysynda tekserilýde. Tergeý nátıjesine sáıkes E.Ahmetovti soqqyǵa jyqqany úshin aıyptalǵan oblystyq ІІD qyzmetkeri Jıdeshev Taraz qalalyq sotymen sottalǵan. Úkim zańdy kúshine engen joq. Іsti apellıatsııalyq tártippen qaıta qaraý aǵymdaǵy jyldyń 20 jeltoqsanyna belgilengen», - dep habarlady Bas prokýratýradan.
Aıta keteıik, aǵymdaǵy jyldyń 6 jeltoqsany kúni kúndizgi saǵat 12-16-da QR Bas prokýratýrasynyń baqylaý-ótkizý pýnktinde 1968 jyly dúnıege kelgen Maıra Rysmanova ózin-ózi órtep, qalalyq aýrýhanaǵa jetkizilgen bolatyn. Búgin ol qaıtys boldy.