Bas Prokýror qylmystyq zańnyń jańa modeline kóshýdiń biryńǵaı josparyn oryndaýdy jyldamdatýdy tapsyrdy

ASTANA. QazAqparat - Búgin Bas Prokýror Ashat Daýylbaevtyń tóraǵalyǵymen Memleket basshysynyń Ókimimen bekitilgen Qylmystyq zańnyń jáne qylmystyq sot óndirisiniń jańa modeline kóshý jónindegi biryńǵaı memlekettik is-qımyl josparyn júzege asyrý máseleleri boıynsha vedomstvoaralyq jınalys bolyp ótti.

Keńes jumysyna Joǵarǵy sottyń, Ulttyq qaýipsizdik komıtetiniń, Ekonomıkalyq qylmysqa jáne sybaılas jemqorlyqqa qarsy kúres agenttiginiń ókilderi, sondaı-aq qorǵanys, ishki ister, ádilet, qarjy, tótenshe jaǵdaılar jónindegi mınıstrlikterdiń, memlekettik kúzet qyzmetiniń basshylary men jaýapty qyzmetkerleri qatysty.

Bas Prokýror atap ótkendeı, Biryńǵaı josparǵa sáıkes quqyq qorǵaý organdaryna qyryqtan astam is-sharalar júktelgen jáne sáıkes bólimderdi buljytpaı oryndaý jaýapty memlekettik organdardyń mańyzdy ári aldyńǵy kezektegi mindeti bolyp tabylady.

Jınalys barysynda jaýapty memlekettik organdardyń ókilderi berilgen tapsyrmalardyń oryndalý jaǵdaıy týraly aqparattandyrdy. Problemalyq máseleler talqylanyp, olardy sheshý joldary aıqyndaldy.

A.Daýylbaev jaýapty tulǵalardyń esepterin tyńdap bolǵan soń Biryńǵaı jospardyń bólimderin oryndaýdy jyldamdatýdy tapsyryp, Memleket basshysynyń tapsyrmalaryn ýaqytynan keshiktirip oryndaǵan jaǵdaıda jaýapkershilik bolatyny týraly eskertti, dep habarlaıdy Bas prokýratýranyń baspasóz qyzmetinen.