Bas prokýror dızel baǵasynyń ósýine sebepshilerdi atady
«Prokýratýra organdary Qarjylyq monıtorıng, Bəsekelestikti qorǵaý jəne damytý agenttikterimen birlesip, dızel otyny baǵasynyń ósýi men tapshylyǵynyń naqty mən-jaılaryn, sebepterin zerdeleýde ekenin, «jasyryn» sulbalardy, bəsekelestikke qarsy is-qımyldar men kelisimderdi, sondaı-aq shekti baǵalardyń artý faktilerin anyqtaý jónindegi jumysty uıymdastyrǵanyn habarlaımyz. Baǵanyń ósýine munaı berýshilerdiń tarapynan aıla-sharǵy saldarynan onyń jasandy kóterilýi yqpal etkeni anyqtaldy», - dedi Bas prokýror jaýabynda.
Məselen, onyń dereginshe, usaq munaı berýshiler jaǵdaıdy paıdalanyp, kóterme baǵany ósirip, marjany jasandy túrde arttyrǵan.
«Olardyń qyzmeti monopolııaǵa qarsy zańnamamen rettelmeıdi. Óıtkeni taýar naryǵyndaǵy úlesi tómen jəne kóterme baǵalar shekti baǵamen shektelmeıdi. Atap aıtqanda, qoldanystaǵy shekti bólshek saýda baǵasy 230-260 teńge bolǵan kezde, keıbir berýshiler otyndy kóterme baǵamen 260 teńgeden astam baǵaǵa, jeke jaǵdaılarda 360-413 teńgege satqan. Jekelegen óńirlerde dızel otynynyń kóterme baǵasy 1 lıtr úshin 450-500 teńgege jetti. Bul shaǵyn bólshek janar-jaǵararmaı quıý stantsııalarynyń (JQS) satylymnyń tıimsizdigine baılanysty otyn satýyn toqtata turýǵa jəne naqty, otyn tapshylyǵyna alyp keldi. Enegretıka mınıstrliginiń derekterine səıkes, tapshylyq órship turǵanda 633 JQS dızel otynyn satpaǵan. Búgingi kúni mundaı JQS-tyń sany 267-ge deıin azaıdy», - dedi Berik Asylov.