Bas Prokýror birqatar qyzmetkerlerge mindetterin minsiz atqarǵandary úshin vedomstvolyq nagradalar tapsyrdy

ASTANA. 6 mamyr. QazAqparat - Bas prokýratýrada Jeńis kúni jáne Otan qorǵaýshylar kúnine arnalǵan saltanatty jınalys erekshe merekelik jaǵdaıda bolyp ótti.

Saltanatty jınalysty ashý barysynda Bas Prokýror Ashat Daýylbaev ardagerlerge olardyń maıdandaǵy jáne eńbektegi erlikteri úshin rızashylyǵyn bildire otyryp, Jeńistiń 68 jyldyq merekesimen quttyqtady.

Uly Otan soǵysy ardagerleriniń arasynda prokýratýra organdarynan shaıqasqa attanǵandar da az emes, soǵystan keıin olardyń kópshiligi óz ómirlerin qylmyspen kúreske arnady.

A.Daýylbaev prokýratýra organdarynyń ardagerleri Amantaı Bájeevke jáne Mıhaıl Nabatovqa «Minsiz qyzmeti úshin» vedomstvolyq nagradasyn tapsyrdy. Aqsaqaldar jas urpaqqa qaza tapqan batyrlardyń esteligine laıyq bolýdy, prokýrorlyq kásiptiń úzdik dástúrlerin saqtaý jáne kóbeıtý jónindegi tilekterin aıtty.

Otan qorǵaýshylar kúni qarsańynda Memleket basshysynyń Jarlyǵymen prokýratýra organdarynyń birqatar jetekshileri joǵary synyptyq shender men áskerı shenderge, sondaı-aq joǵary memlekettik nagradalarǵa ıe boldy.

«Qazaqstan Respýblıkasynyń Bas Prokýrory Ashat Daýylbaevqa 1-synypty memlekettik ádilet keńesshisi, Bas Prokýrordyń birinshi orynbasary Iogan Merkelge 2-synypty memlekettik ádilet keńesshisi synyptyq shenderi berildi. Bas áskerı prokýror Erǵalı Merzadınov ádilet general-leıtenanty shenin aldy. Bas Prokýrordyń orynbasary Jaqyp Asanov, Mańǵystaý oblysynyń prokýrory Sabyrjan Bekbosynov, Qaraǵandy oblysynyń prokýrory Asqar Sekishev, Bas prokýratýranyń Departament bastyǵy Nurjan Isaqov 3-synypty memlekettik ádilet keńesshisi atandy»,-delingen QR Bas prokýratýrasy baspasóz qyzmetiniń málimetinde.

Táýelisiz Qazaqstan tarıhynda tuńǵysh ret generaldyq shen - 3-synypty memlekettik ádilet keńesshisi synyptyq sheni áıel adamǵa - Bas prokýratýranyń Quqyqtyq statıstıka jáne arnaıy esepke alý jónindegi komıtetiniń tóraıymy Sáýle Aıtpaevaǵa berildi.

Bas áskerı prokýrordyń orynbasary Qusaıyn Igembaev ІІ dárejeli «Aıbyn» ordenimen, Bas áskerı prokýratýranyń qyzmetkerleri Ashat Qazıev pen Nurjan Nurahmetov «Eren eńbegi úshin» medaldarimen nagradtaldy.

Bas Prokýror ortalyq apparattyń birqatar qyzmetkerlerine qyzmettik mindetterin minsiz atqarǵandary, zańdylyqty jáne quqyqtyq tártipti nyǵaıtýǵa qosqan úlesteri úshin kezekten tys synyptyq shender, vedomstvolyq nagradalar jáne qurmet gramotalaryn tapsyryp, marapattady.