Bas prokýror balalardy zorlaý máselesi boıynsha úndeý jarııalady

ASTANA. QazAqparat - Búgin balalardy zorlaý máselesine arnalǵan jıynda Bas prokýror Jaqyp Asanov el xalqyna arnaıy úndeý joldady, dep xabarlaıdy QazAqparat tilshisi.

"Kóp jaǵdaıda qylmyskerlerdiń aram nıetin júzege asyrýǵa negizgi sebep - eresekterdiń muqııatsyzdyǵy. Sanasy tolyq bekimegen, ár nársege sengish, kóngish jas bala syrttan keler qaýipti qaıdan bilsin? Sondyqtan qaraýsyz qalǵan búldirshin - qylmyskerge ońaı olja.

Balalarymyzdyń deni saý, ómiri qaýipsiz bolsyn desek, birinshiden, árbir ata-ana saq bolýy qajet. Úıde, aýlada, mektepte, demalys oryndarynda, jalpy qaı jerde bolmasyn balany únemi baqylaýda ustańyz.

Ekinshiden, jetkinshekter qorlyqty kóbinese tanysy, tipti jaqyny, ákesi, aǵasy sııaqty adamdardan kóredi. Balaǵa tıisý, aldaý, kúshteý áreketin kórseńiz, dereý 102-ge habarlasyp, shara qoldanyńyz.

Úshinshiden, keıde bolǵan isti aıtpaımyz, jasyramyz, uıat bolady deımiz. Bul durys emes. Onymen qylmystyń jasyryn, sozylmaly túrge aınalýyna kómektesemiz. Sondyqtan balańyzdyń namysy aıaqqa taptalsa, únsiz qalmańyz. Birden quqyq qorǵaý organyna habarlańyz.

Tórtinshiden, balanyń aralasyp júrgen ortasy qandaı, qaı jerlerge jıi barady, ınternette kimmen dos, qandaı saıttarda otyratynyn baıqap júrińiz. Balamen jıi, ashyq áńgimelesý - ony azǵyndardan qorǵaýdyń eń tıimdi amaly.

Besinshiden, qaýipti jaǵdaıda ne isteý kerektigin balaǵa túsindirip úıretken jón. Ondaı aqparatty ınternetten jáne jaqyn arada iske qosylatyn «Prokýrordyń 100 keńesi» degen mobıldik qosymshadan alýǵa bolady.

Mundaı qylmystardyń aldyn alý úshin tek memlekettiń sharalary jetkiliksiz. Oǵan árqaısysymyz jeke jáne búkil qoǵam bolyp qarsy turaıyq!", - dedi J.Asanov.

Bas prokýrordyń aıtýynsha, búginde elimizde jynystyq qylmys jasaǵandarǵa qatysty 20 jylǵa deıin nemese ómir boıyna bas bostandyǵynan aıyrý jazasy qoldanylady. Olardyń jazasy jeńildetilmeıdi. Sottalǵandar ýaqytynan buryn bosatylmaıdy, amnıstııaǵa jatpaıdy, olarmen eshqandaı protsestik kelisim jasalmaıdy. Jaza merzimin tolyq óteıdi. Mundaı qylmyskerler balalarmen jumys jasaý quqyǵynan ómir boıyna aıyrylady. Budan bólek, 2018 jylǵy 1 qańtardan bastap hımııalyq kastratsııa qoldanylmaq. Bul degenimiz qylmyskerlerdi arnaıy dári-dármekterdi qabyldaýǵa májbúrleıdi. Sondaı-aq quqyqtyq statıstıka komıtetiniń infopublic.pravstat.kz saıtynda pedofılderdiń kartasy iske qosyldy. Onda olardyń fotosýreti men anketasy bar. Bul servısti kez kelgen adam erkin paıdalana alady.