Bas prokýror Bala quqyqtary jónindegi ýákil Dınara Zákıevamen kezdesti

ASTANA. QazAqparat - Bas prokýror Berik Asylov Qazaqstan Respýblıkasyndaǵy Bala quqyqtary jónindegi ýákil Dınara Zakıevamen kezdesti, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Kezdesý barysynda qadaǵalaý organynyń basshysy Balalar ombýdsmenin kámeletke tolmaǵandardyń quqyqtaryn qorǵaý salasyndaǵy jumys jáne otbasylyq-turmystyq zorlyq-zombylyq úshin jaýapkershilikti kúsheıtýge baǵyttalǵan zańnamalyq ózgerister týraly habardar etti.

Atap aıtqanda, balalardyń jynystyq qol suǵylmaýshylyǵyna qarsy qylmystary úshin jaza kúsheıtildi. Mundaı ister boıynsha shartty túrde sottaý jáne shartty túrde merziminen buryn bosatý sharasy qoldanylmaıdy.

Taraptardyń tatýlasýyna baılanysty osy sanattaǵy qylmystyq isterdi toqtatýǵa tyıym salyndy.

Budan basqa, «Prokýratýra týraly» Konstıtýtsııalyq zańda prokýrordyń kámeletke tolmaǵandardyń múddesi úshin tekserýler júrgizý jáne ótinishterdi qaraý jónindegi ókilettikterin kózdeıtin novellalar bekitilgen.

«Prokýratýra organdary úshin balalardy qorǵaý árqashan basymdyqqa ıe boldy jáne bolady», - dep atap ótti Bas Prokýror.

Jeke másele boıynsha balalarǵa qatysty jynystyq qylmystar týraly qylmystyq isterdi tergeýdiń tıimdiligin arttyrý sharalary talqylandy.

Árbir osyndaı is boıynsha qylmys tirkelgen sátten bastap áreket etetin «erekshe qadaǵalaý» tetigi belgilengen.

Óz kezeginde Dınara Zakıeva balalardyń, onyń ishinde ata-anasynyń qamqorlyǵynsyz qalǵan balalardyń quqyqtaryn qorǵaý tetikterin nyǵaıtý jónindegi óz kózqarasymen bólisti jáne zańnamany jetildirý jóninde usynystar engizdi.

Kezdesý barysynda taraptar jumysta tyǵyz ózara is-qımylǵa daıyn ekendikterin bildirdi.