Bas Prokýror Ashat Daýylbaev azamattardy jeke qabyldaý ótkizdi

ASTANA. 6 qarasha. QazAqparat - Búgin Bas Prokýror Ashat Daýylbaev kezekti ret azamattardy jeke qabyldaý júrgizdi. Qabyldaýda bolǵan azamattardyń ótinishteri negizinen qylmystyq, azamattyq jáne ákimshilik ister jónindegi sot aktileriniń zańdylyǵy boıynsha shaǵymmen baılanysty boldy.

«Aryzdanýshylardyń ýájderin muqııat tyńdaǵan soń A.Daýylbaev Bas prokýratýranyń sáıkes qurylymdyq bólimsheleriniń basshylaryna olardy tolyq jáne jan jaqty tekserýdi qamtamasyz etýdi, zańdylyqtyń buzylýy anyqtalǵan jaǵdaıda buzylǵan quqyqtardy qalpyna keltirý boıynsha túbegeıli sharalar qabyldaýdy, kináli tulǵalardy zańmen belgilengen jaýapkershilikke tartýdy talap etken naqty tapsyrmalar berdi»,-delingen Bas prokýratýra baspasóz qyzmetiniń málimetinde. Aryzdanýshylarmen beınekonferentsııalyq baılanysty qoldaný arqyly sóılesý búgingi qabyldaýdyń ereksheligi boldy. Osynyń nátıjesinde Mańǵystaý, Batys Qazaqstan, Soltústik Qazaqstan, Qaraǵandy jáne Ońtústik Qazaqstan oblystarynyń turǵyndary Astanaǵa kelmeı-aq Bas Prokýrorǵa óz aryzdaryn aıta aldy. Bıylǵy jyldyń basynan beri Bas prokýratýra basshylyǵy qabyldaýdyń osyndaı túrimen 52 ret azamattardy qabyldaý ótkizdi. Osy merzim ishinde jeke jáne zańdy tulǵalardan 276 ótinish kelip tústi. Sonyń ishinde Bas Prokýrordyń jeke qabyldaýynan - 100 ótinish tústi, olardyń ishinde negizgi bóligi sot aktileriniń zańdylyǵyna, sondaı-aq qylmystyq qýdalaý organdarynyń áreketteri men aktilerine qatysty boldy. Prokýratýra organdary basshylyǵynyń jeke qabyldaýynan túsetin ótinishter sanynyń artýy prokýratýra organdary quqyq qorǵaýshylyq fýnktsııasynyń ózektiligin, sondaı-aq azamattardyń áleýmettik belsendiligin kórsetedi. Bas prokýratýranyń ınternet-saıtynda Jeke qabyldaý erejesi, sondaı-aq Bas prokýratýra basshylyǵynyń azamattardy qabyldaý kestesi ornatylǵan, aryzdanýshylarǵa jeke qabyldaýdy uıymdastyrýmen baılanysty keńester men málimetterdi jedel usyný úshin baılanys telefondarynyń nómirleri kórsetilgen.