Bas prokýror áriptesteri buryn ne úshin sottalǵanyn aıtty

ASTANA. QazAqpara  - Qazirgi kezde qylmys boıynsha statıstıka baıaǵydaı ótirik emes. Bul týraly Parlament Májilisiniń jalpy otyrysynda QR Bas prokýrory Jaqyp Asanov málim etti, dep habarlaıdy QazAqparat.

«Tergeý organdary bir qylmysty tez ashamyz dep artyq ketip qalýy múmkin. Sondyqtan bul zań jobasynyń basty mindeti osyndaı zańsyzdyqqa tosqaýyl bolý, ıaǵnı adamnyń quqyǵy men qylmyspen kúres arasyndaǵy bir teńgerimdi ustap turý. Árıne, bul teńgerimdi ustaý úshin ishki ahýalǵa baılanysty qylmystyq zańnamalarǵa ár memleket óziniń ózgeristerin engizip turady. 90-shy jyldary qylmys órship turdy, sonda biz quqyqqorǵaý organdaryn kúsheıttik. Bul turǵyda Elbasy qylmyspen kúresti óz qolyna aldy. Sonyń nátıjesinde jıyrma jyl qatarynan, 1996 jyldan bastap adamǵa qarsy jasalatyn asa aýyr qylmystar jyl saıyn azaıyp keledi», - dep atap ótti Jaqyp Asanov  quqyq qorǵaý qyzmetiniń protsestik negizderin jańǵyrtýǵa baǵyttanǵan zań jobasy týraly baıandamasynda.

Bul rette Bas prokýror 90-shy jyldary elimizdegi kolonııalarda 105 myń adam otyrsa, búginde bul kórsetkish úsh esege azaıǵanyn alǵa tartty. Onyń sózine qaraǵanda, qazirgi tańda túrmedegi adam sany 35 myńdy quraıdy.

«Oń ózgerister bolyp jatyr, biraq bizde mundaı jaqsy ózgeristerge senbeıtinder de joq emes. Nege senbeımiz? Buryn tynysh bolǵan sııaqty, qazir qylmys órship turǵandaı. Óıtkeni qazir barlyǵy ashyq, al buryndary jabyq bolatyn, ıaǵnı halyq kóp nárseni bilmeıtin. Búginde bir qylmys oryn alsa, ınternette tez tarap, búkil el bolyp sony talqylaımyz. Sonyń ishinde, qazirgi kezde statıstıka baıaǵydaı "ótirik" emes. Sebebi buryn aýyr ári asa aýyr qylmys jasyrylsa, quqyq qorǵaý organdaryna ári ketse sógis beretin, al búgin ol úshin sottaıdy. Osy úshin talaı áriptesterimiz sottaldy. Sosyn oǵan qazir bara bermeıdi. Sondyqtan qazaqstandyqtardyń qaýipsizdik jaǵynan ómiri jyl saıyn jaqsaryp keledi. Osy oraıda kisi óltirý, densaýlyqqa aýyr zııan keltirý sekildi asa aýyr qylmystar  azaıyp jatyr», - dedi Jaqyp Asanov.

Esterińizge sala keteıik, bıyl qazan aıynda Memleket basshysy Konstıtýtsııanyń 61-babynyń 1-tarmaǵyna sáıkes Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn engizdi.