Bas prokýratýranyń jobalary Reseıde úzdikterdiń qatarynan tabyldy
«Jyldyń úzdik jobasy - keshendi jobany basqarý» nomınatsııasy boıynsha 1-oryndy «Túrmedegilerdiń sanyn azaıtý boıynsha 10 shara» jobasy jeńip aldy. Júldeni Reseı Federatsııasy Úkimeti Apparaty basshysynyń birinshi orynbasary Akımov M.A. tabystady.
«Prokýratýra. Smart - basqarý» nomınatsııasynda «Bıznesti qorǵaý» jobasy birinshi oryn aldy. Ekinshi orynǵa - «Zańdylyq». Úshinshi orynǵa- «Otbasyndaǵy zorlyq-zombylyqsyz Qazaqstan» jáne «Prokýratýraǵa - úzdik kadrlar» jobalary ıe boldy.Sonymen qatar «Tsıfrlyq úzdik joba» jekelegen nomınatsııasynda «Zańdylyq» jobasy jeńiske jetti. Bas prokýratýranyń «Ózgerister baǵdarlamasy» ishki kommýnıkatsııasynyń júıesi arnaıy sertıfıkatpen marapattaldy
Reseı Federatsııasynyń Úkimeti janyndaǵy Saraptama ortalyǵy «Proektnyı Olımp» memlekettik sektorda kásibı jobalyq basqarý boıynsha baıqaýdy jyl saıyn ótkizedi. Baıqaýǵa federaldy jáne mýnıtsıpaldyq memlekettik organdarmen qatar Sberbank, Rosatom jáne basqa da reseılik bıznes alpaýyttary qatysty.
Jalpy alǵanda 250-den asa ótinish berilip, olardyń 77-si ǵana fınalǵa ótken. Memlekettik sektorda jobalyq basqarý boıynsha Qazaqstannan Bas prokýratýra jalǵyz fınalǵa shyqty. Atalmysh baıqaýdyń maqsaty - jobalyq basqarýdyń tıimdi quraldaryn óz qyzmetine belsendi engizýshi jáne ulttyq tájirıbeni dáripteýshi memlekettik sektordyń mekemelerin qoldaý bolyp tabylady.
«Prokýratýra organdarynda jobalyq menedjment engizý ótken jyldan bastap belsendi qoldanysqa engizildi. Qazirgi tańda prokýratýranyń qorjynynda 300-ge jýyq bastamalar bar. 50 joba áser etý aımaǵynda, 25-i prokýratýranyń baqylaýynda, sondaı-aq 11 joba Bas prokýratýranyń jeke baqylaýynda tur. Baıqaý barysynda mekemede jobalardy basqarý júıesiniń tıimdiligi baǵalanady. Áriptesterimizdi laıyqty jeńisi men halyqaralyq deńgeıde moıyndalǵandyǵymen quttyqtaımyz»,-delingen prokýratýra taratqan málimetterde.