Bas prokýratýrada shetelge zańsyz shyǵarylǵan kapıtaldy qaıtarý máselesi qaraldy

NUR-SULTAN. QazAqparat - Bas prokýror Berik Asylovtyń tóraǵalyq etýimen ekonomıkalyq resýrstardy zańsyz shoǵyrlandyrýǵa qarsy is-qımyl máseleleri jónindegi vedomstvoaralyq komıssııanyń otyrysy ótti. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

Otyrysty ashqan Bas Prokýror is-sharaǵa qatysýshylardyń nazaryn Memleket basshysy qoıǵan negizgi mindetterge aýdardy. Bul – zańsyz shyǵarylǵan qarjy qarajatyn elge qaıtarý boıynsha júıeli sharalardy ázirleý jáne iske asyrý, sondaı-aq ekonomıkalyq resýrstardyń monopolııalyq (olıgopolııalyq) shoǵyrlanýyn anyqtaý.

Olardy iske asyrý otandyq ekonomıkany saýyqtyrýǵa, kiristerdi ádil bólýge jáne azamattardyń ómir súrý deńgeıin arttyrýǵa mýltıplıkatıvtik áser etýi tıis.

Otyrysta Komıssııa tóraǵasynyń orynbasary – Bas Prokýrordyń orynbasary Ulan Baıjanov, sondaı-aq memlekettik organdardyń birinshi basshylary baıandama jasady.

Sharalar keshenin talqylaı otyryp, kapıtaldy elden zańsyz shyǵarýdy boldyrmaý jáne quqyqqa qarsy jolmen alynǵan resýrstardy qolynda shoǵyrlandyrǵan sanaýly adamdar sheńberiniń zańsyz baıýy úshin jaǵdaılardy joıý alǵashqy kezektegi sharalardyń biri dep tanyldy.

Sondaı-aq halyqaralyq tájirıbeni eskere otyryp, olıgopolııa sýbektileriniń aktıvterdi memleketke qaıtarý múmkindigi týraly usynys qaraldy.

Bul rette, B. Asylov Komıssııanyń jumysy adal kásipkerler úshin bóget bolmaýy qajet ekendigin atap ótti.

«Barlyq sheshimder tekserilip, muqııat pysyqtalǵan soń ǵana qabyldanýy kerek», - dedi ol.

Otyrys qorytyndysy boıynsha Komıssııa jumysynyń basym baǵyttary aıqyndaldy.