Bas prokýratýrada quqyq qorǵaý organdarynyń kadrlyq áleýetin damytý máselesi talqylandy

ASTANA. QazAqparat - VIIІ Astana ekonomıkalyq forýmy aıasynda Bas prokýratýrada «Zamanaýı qoǵamnyń áleýmettik-ekonomıkalyq ózgerýi jaǵdaıynda quqyq qorǵaý organdarynyń kadrlyq áleýetin damytýdyń strategııasy» taqyrybynda paneldik sessııa bolyp ótti.

Bul týraly Bas prokýratýranyń baspasóz qyzmeti habarlady.

Onyń jumysyna Qazaqstan Respýblıkasy Prezıdentiniń Ákimshiligi, Parlament, Premer-Mınıstr Keńsesi, quqyq qorǵaý, arnaýly jáne ózge de memlekettik organdardyń, sondaı-aq úkimettik emes uıymdardyń ókilderi, otandyq jáne sheteldik sarapshylar men ǵalymdar qatysty.

Kún tártibindegi basty taqyryp - quqyq qorǵaý organdarynyń kadrlyq jumystaryn jańartýdyń ózekti máselelerin talqylaý, joǵary bilikti kadrlar áleýetin qalyptastyrýǵa baılanysty zamanaýı sheshimderdi izdestirý boldy.

Otyrys barysynda tıimdi kadrlyq qamtamasyz etýdi qurý, úmitkerlerdi irikteý, personaldar qyzmetiniń tıimdiligin baǵalaý, eńbekke yntalandyrý ádisteri, quqyq qorǵaý qyzmetinde satylap ósý modeli, halyqaralyq tájirıbeni zertteý júıesin jetildirýdiń ózekti aspektileri boıynsha ózara pikirtalas boldy.

Sheteldik sarapshylar jáne Reseı, AQSh, Kanada, Qyrǵyzstan elderinen kelgen mamandar osy máseleler boıynsha óz oılarymen bólisip, kúsh qurylymdaryn kadrlyq qamtamasyz etýdiń ulttyq modelderiniń erekshelikteri týraly áńgimelep berdi.

Osy kezdesýdiń qatysýshylary, halyqaralyq deńgeıde quqyq qorǵaý organdaryndaǵy kadrlyq menedjmentti jetildirý máselelerin talqylaý boıynsha Qazaqstan Bas prokýratýrasynyń bastamasyna joǵary baǵa berdi.

Óz kezeginde, otandyq spıkerler Quqyq qorǵaý organdarynyń kadrlyq saıasatynyń tujyrymdamasy aıasynda kadrlyq áleýetti qalyptastyrý men nyǵaıtýǵa baılanysty qabyldanyp jatqan sharalarǵa toqtalyp ótti. Atap aıtqanda, personaldardy irikteý júıesin jetildirý, kadrlyq rezervpen jumys júrgizý, qyzmetkerlerdiń quzyrlyǵyn baǵalaýdyń progressıvtik júıesin engizý, qyzmetke kirý kezinde polıgrafologııalyq zertteýden ótkizý týraly máseleler talqylandy.

Sonymen qatar, jaqynda ǵana qurylǵan Bas prokýratýranyń janyndaǵy Quqyq qorǵaý organdarynyń Akademııasy kúsh qurylymdarynyń kadrlyq saıasatyn jetildirý boıynsha mindetterdi iske asyrýdyń mańyzdy bóligi retinde bolatyny atap ótildi. Jańa oqý mekemesi kadrlardyń jańa býynyn oqytý men tárbıeleý isinde basty ortalyq bolmaq, al onyń túlekteri halyqtyń joǵary senimine ıe jáne halyqaralyq standartqa jaýap beretin quqyq qorǵaý júıesin qurý týraly Memleket basshysy belgilegen mindetterdi júzege asyratyn bolady.