Bas prokýratýra jelide taraǵan Bergeı Rysqalıevtiń vıdeosyna qatysty pikir bildirdi
Bas prokýrordyń orynbasary Marat Axmetjanovtyń aıtýynsha, Atyraý oblysynyń eks-ákimi Bergeı Rysqalıevti Ulybrıtanııada túsirip alǵan. Atalǵan memleketpen sottalǵan azamattardy ustap tapsyrý boıynsha ózara kelisim joq. Degenmen, jemqor sheneýnikti basqa joldarmen aldyrtý sharalary qarastyrylyp jatyr.
"Árıne, biz ol vıdeony kórdik. Endi, ol - xalyqaralyq izdeýde júrgen azamat. Bárińiz bilesizder, Qazaqstanda oǵan qatysty qylmystyq is bar. Sondyqtan onyń jaýapkershiligi áli de qaralady. Ókinishke qaraı, bizde Ulybrıtanııamen qashyp ketken azamattardy bir-birimizge berýge qatysty kelisim joq. Biraq bizdiń barlyq quqyqtyq suraýlarymyz Interpolǵa da, bárine jan-jaqty jiberildi", - dedi M.Axmetjanov Ortalyq kommýnıkatsııalar qyzmetinde ótken baspasóz máslıxatynda.
Aıta keteıik, tergeý materıaldary boıynsha Bergeı Rysqalıev qolastyndaǵy sybaılastarymen birge memleket qarajatyn qylmystyq jolmen jymqyrý josparyn jasaǵan. Olardyń bul áreketinen kelgen zalaldyń kólemi 72 mıllıard teńgege baǵalandy.
Qylmystyq istiń fıgýranttary: B. Rysqalıev, onyń aǵasy A. Rysqalıev jáne 7 adam, qylmystyq is 754 tomnan turady. B. Rysqalıevtiń komandasyna qatysty alǵashqy sot 2014 jyly ótken bolatyn. Sol kezde ishinde sheneýnigi bar, bıznesmeni bar - jalpy 11 adam túrli merzimge bas bostandyǵynan aıyrylǵan bolatyn. Sot aǵaıyndy Rysqalıevterge qatysty syrttaı úkim shyǵardy. Oǵan sáıkes, Bergeı Rysqalıev 17 jylǵa, al ony aǵasy Amanjan Rysqalıev 16 jylǵa sottaldy.