Bas prokýratýra jaıylym bólýdegi zańsyzdyqtardy tekserip jatyr

NUR-SULTAN. QazAqparat – Bas prokýratýra ákimdikterdiń jaıylym alqaptaryn bólý, aýyl mańyndaǵy jaıylymdardy uzaq merzimge jalǵa berý kezinde zańdy qanshalyqty saqtaǵanyn tekserip jatyr, dep habarlaıdy QazAqparat tilshisi.

Premer-Mınıstrdiń orynbasary Roman Sklıar Májilis ókilderiniń depýtattyq saýalyna bergen jaýabynda osyndaı aqpar berdi.

«Memleket basshysynyń tapsyrmasyn oryndaý maqsatynda Bas prokýratýra ákimdikterdiń qyzmetinde jaıylymdyq alqaptardy bólý, onyń ishinde aýyl mańdaryndaǵy jaıylym alqaptardy uzaq merzimge jalǵa berý kezindegi zańdylyqtyń saqtalýyna tekserýler júrgizýde. Bul jumys jyl aıaǵyna deıin júrgiziletin bolady jáne nátıjesi boıynsha zańsyz berilgen jer ýchaskilerin qaıtarý boıynsha tıisti sheshimder qabyldanady. 2019 jyldyń basynan beri 5,36 mln gektar alqapta paıdalanylmaǵan jaıylymdar anyqtaldy. Onyń ishinde 2,31 mln gektar qaıta aınalymǵa tartyldy. 1,11 mln gektar memlekettik menshikke qaıtaryldy. Al 1,94 mln gektar jaıylymdyq jerdi memleket menshigine qaıtarý boıynsha sot protsesteri júrip jatyr», - dedi vıtse-Premer.

Ol, sondaı-aq, jaıylymdardy basqarý josparynyń ashyqtyǵyn qamtamasyz etý úshin jobalardy ınternet resýrsyna ornalastyrý qolǵa alynǵanyn eske saldy.

«Josparlardy ázirleý kezindegi kemshilikterdi joıý úshin Aýyl sharýashylyǵy mınıstrligi Parlament Májilisiniń Agrarlyq komıtetimen birlesip, jospardyń pılottyq jobasyn ázirlep, úlgi retinde barlyq oblystar ákimdikterine jiberdi. Osyǵan baılanysty, qabyldanǵan 144 jospar osy úlgilik jobaǵa sáıkes qaıta pysyqtalynyp qabyldandy», - deıdi Roman Sklıar.

Sondaı-aq, vıtse-Premer brýtsellezge qarsy rusat etilgen vaktsınalar tizimin qaıdan tabýǵa bolatynyn aıtty.