Bas prokýratýra janyndaǵy Zańdylyqty qamtamasyz etý jónindegi Qoǵamdyq keńes otyrysynda qylmystyq úderis tájirıbesine jańa úlgiler engizý máseleleri qaraldy

ASTANA. 2 qazan. QazAqparat - Parlament Májilisiniń depýtaty Qýanysh Sultanovtyń tóraǵalyǵymen Bas prokýratýranyń Zańdylyqty qamtamasyz etý máseleleri jónindegi qoǵamdyq keńesiniń qylmystyq quqyq pen qylmystyq protsesti jetildirý, sondaı-aq dinı ekstremızm men lańkestikke qarsy turýdyń ózekti máselelerin talqylaýǵa arnalǵan kezekti otyrysy bolyp ótti.

Bul týraly QR Bas prokýratýrasynyń baspasóz qyzmeti habarlady.

Otyrys barysynda Bas prokýratýra ázirlegen kodeksterdiń jobalary aıasynda qylmystyq jáne qylmystyq is júrgizý zańnamalaryn jańǵyrtýdyń mańyzdy baǵyttary jan-jaqty talqylandy.

Jańa qylmystyq-quqyqtyq ınstıtýttar ashý, sotqa deıingi is júrgizýdi jeńildetý, qylmystyq protsess tájirıbesine jańa úlgiler engizý máseleleri qarastyryldy. Atap aıtqanda, qylmystyq teris qylyq sııaqty zańǵa qaıshy áreketter sanatyn engizý, tergeý sýdıasy ınstıtýtyn engizý, qylmystyq jaza júıesin qaıta qaraý, bas bostandyǵynan aıyrýdyń balama sharalaryn qoldanýdyń aıasyn keńeıtý, kıberqylmystar úshin jaýapkershilikti qatańdatý jáne basqa máseleler boıynsha qyzý pikirtalas bolyp ótti.

Otyrysqa qatysýshylar atap kórsetkendeı, usynylyp otyrǵan jańashyl baǵyttar azamattardyń quqyqtary men bostandyqtaryn, qoǵam men memlekettiń múddelerin qoǵamdyq qaýipti qaterlerden qorǵaýdyń sapaly jańa deńgeıin qamtamasyz etýge, qylmystyq protsesti aıtarlyqtaı jeńildetýge jáne jyldamdatýǵa, qylmystyq zańnamany qalyptasqan halyqaralyq ólshemge barynsha jaqyndatýǵa baǵyttalǵan.

Sondaı-aq, belgili qoǵam qaıratkerlerinen, depýtattyq korpýstyń, ǵylymı qoǵamdastyqtyń, buqaralyq aqparat quraldarynyń, úkimettik emes uıymdar men qoǵamdyq birlestikterdiń ókilderinen turatyn Qoǵamdyq keńes músheleri lańkestikke qarsy turýdyń memlekettik júıesiniń tıimdiligin arttyrýǵa, dinı ekstremızm profılaktıkasyn kúsheıtýge, qoǵam men memleketti lańkestik qaýip-qaterden qorǵaýdy qamtamasyz etýge baǵyttalǵan syndarly usynystaryn bildirdi. Bul usynystardy memlekettik organdardyń ókilderi maquldap jáne oǵan qoldaý bildire otyryp, lańkestikke tosqaýyl qoıýda memlekettik saıasattyń qol jetkizetin jetistigi eń aldymen memleket pen qoǵamnyń birlese jáne kelise otyryp is-qımyl jasasýyna baılanysty ekendigin atap kórsetti.