Bas prokýratýra zańsyz shyǵarylǵan 21 myńnan astam salyq buıryqtarynyń kúshin joıdy

ASTANA. QazAqparat - Prokýrorlar kásipkerlerge qatysty salyq buıryqtaryn shyǵarýdyń zańsyz tájirıbesin toqtatty, dep habarlaıdy QazAqparat.

Salyq kodeksi boıynsha salyq buıryqtary salyq tóleýshi – kásipker bolyp tabylmaıtyn jeke tulǵadan 1 AEK-ten astam mólsherde salyq bereshegin óndirip alý kezinde shyǵarylýy múmkin ekenin atap ótken jón.

Sonymen qatar, olar qaıtys bolǵan adamdarǵa, múgedekterge qatysty, sondaı-aq habarlama berilmeı shyǵarylmaıdy.

«Osyǵan qaramastan, atalǵan sanattaǵy adamdarǵa qatysty memlekettik kirister organdary zańsyz buıryqtar shyǵaryp, keıinnen bereshekti óndirip alý boıynsha májbúrleý sharalaryn qoldana otyryp, atqarýshylyq is júrgizýdi qozǵaǵan. Nátıjesinde, shottarǵa tyıym salynǵannan keıin kásipkerler qaryzdy tólep qana qoımaı, sot oryndaýshylardyń jumysyna aqy tóleýge májbúr bolǵan. Mysaly, Almaty qalasynda JK «H.» 430 myń teńgeni óndirip alý týraly salyq buıryǵy shyǵarylǵan. Sot oryndaýshysy kásipkerdiń banktik shotyna tyıym salyp, bul onyń qalypty jumysyna kedergi keltirgen», - dep jazdy Bas prokýratýradan.

Prokýratýra aktisi boıynsha salyq buıryǵynyń kúshi joıyldy, shekteý sharalary alynyp tastaldy, al atqarýshylyq is júrgizý toqtatyldy. Jalpy respýblıka boıynsha 23 myń osyndaı buzýshylyq anyqtaldy. Sondyqtan Bas prokýratýra Úkimetke naqty usynystar engizdi. Nátıjesinde qadaǵalaý aktisi boıynsha 21 myńnan astam salyq buıryqtary joıyldy, 13 myńnan astam atqarýshylyq is júrgizý toqtatyldy.

Memlekettik kirister komıteti óziniń aqparattyq júıesin (QR BSAJ) jańǵyrtyp, endi mundaı faktiler bolmaıdy (buıryqtar tek jeke tulǵalarǵa qatysty shyǵarylady).

Budan basqa 40-tas astam jeke sot oryndaýshysy jáne salyq organdarynyń 19 qyzmetkeri, onyń ishinde 6 basshy tártiptik jaýapkershilikke tartyldy.

Barlyq memlekettik kirister departamentterimen jáne basqarmalarymen salyq buıryqtaryn shyǵarý máseleleri boıynsha túsindirý semınarlary ótkizildi.