Bas prokýratýra zańsyz astyq eksportyna qatysty iske túsinik berdi

ASTANA. QazAqparat – QR Bas prokýratýrasy astyqty zańsyz eksporttaýǵa qatysty kúdikke ilingen kásipkerlerden uıymdasqan qylmystyq top qurdy degen aıypty alyp tastady, dep habarlaıdy QazAqparat.

Úsh kásipker múliktik zalal keltirdi degen kúdikke ilingen (QK-niń 195-baby 4-bóligi). Atap aıtqanda, olar Reseıden bıdaı satyp alǵan, sodan keıin Qazaqstan astyǵy retinde shetelge zańsyz eksporttaǵan. Tergeý málimetterine qaraǵanda, kásiporyn ıesi kompanııa qyzmetkerlerimen birge qylmystyq top qurǵan. Munda qylmystyń tek ekonomıkalyq quramy bolǵan jaǵdaıda kásipkerler qamaýǵa alynbas edi. Sondyqtan QK-niń 262-baby kásipkerlerdi qamaýǵa alýǵa sebep bolǵan.

«Qylmystyq kodekstiń 262-baby (uıymdasqan qylmystyq top qurý) adam úshin aýyr saldarǵa ákep soǵady. Osy bap aıasynda bas bostandyǵynan aıyrý jazasy belgilenedi. Bizdińshe, uıymdasqan qylmystyq top qurdy degen kúdik orynsyz. Óıtkeni bul úshin joǵary uıymshyldyq pen turaqty áreketter túrindegi birqatar belgiler bolýy tıis. Basshylyqty jáne olardyń qaramaǵyndaǵy jumysshylar arasyndaǵy jumys qatynastaryn qylmystyq top qurý jáne oǵan qatysý dep tanýǵa kelmeıdi», – dedi Bas prokýratýranyń Qylmystyq qýdalaý qyzmetiniń aǵa prokýrory Danııar Ahımbekov.

Osy oraıda qadaǵalaýshy prokýror QK-niń 262-baby boıynsha 3 adamǵa qatysty qylmystyq qýdalaýdy toqtatty.

Bul turǵyda kúdiktilerge qatysty bultartpaý sharasy úıqamaqqa aýystyryldy. ıAǵnı, memleket múddesi aıasynda múliktik zalal keltirý faktisi boıynsha tergeý amaldary jalǵasady.