Bas prokýratýra zańǵa qaıshy 596 saıtty japty
Memorandýmǵa qol qoıýdyń mańyzdylyǵyn aıta otyryp, Andreı Kravchenko Bas prokýratýra men Qazaqstan Internet qaýymdastyǵynyń ózara belsendi árekettesýi prokýratýra organdarynyń úkimettik emes uıymdarmen ózara is-qımyldy jolǵa qoıýdyń jalǵasy bolyp tabylatynyn atap ótti. Taraptar Internet jelisiniń qazaqstandyq segmentinde quqyqqa qaıshy kontenttiń taralýyna qatysty ózekti máselelerdi sheshýge baǵyttalǵan kúsh-jigerdi shoǵyrlandyrýdy kózdep otyr.
«Balalardy nápsiqumarlyqqa paıdalanýmen kúres, jasy kámeletke tolmaǵandar pornografııasymen, lańkestik pen ekstremızmdi nasıhattaý jáne jarııaly túrde aqtaýmen baılanysty zańsyz aqparattardyń taralýyna, sondaı-aq basqa da aqparattyq-kommýnıkatsııalyq tehnologııalardy paıdalaný arqyly jasalatyn basqa da quqyq buzýshylyqtarmen kúres máseleleri árekettesýdiń negizgi baǵyttary bolyp tabylady»,-delingen Bas prokýratýranyń baspasóz qyzmetiniń málimetinde.
Internet-keńistikte zańsyz materıaldardyń taralýynyń jolyn kesý maqsatynda 2011 jyldan bastap prokýratýra organdary basqa memlekettik organdarmen birlesip 90 000 astam ınternet-resýrstardyń monıtorıngin júzege asyryp, ekstremızm jáne lańkestik ıdeıalaryn nasıhattaý, sondaı-aq jarylǵysh qurylǵylardy qoldan jasaý ádisteri týraly aqparattardy taratýdyń anyqtalǵan faktileri boıynsha talap aryzdyq jumys júrgizip, sotqa deıingi retteý sharalary qabyldandy.
Belgili bolǵandaı, Astana jáne Almaty qalalarynyń sottary atalǵan merzim ishinde 596 ınternet-resýrstyń ónimin Qazaqstan aýmaǵynda taratylýyn toqtatý men zańsyz dep taný jónindegi prokýrorlardyń jáne ýákiletti organnyń aryzdaryn qanaǵattandyrdy.