Bas prokýratýra: Zań buzǵan ýchaskelik saılaý komıssııasynyń tóraǵasy qyzmetinen bosatyldy
Bul týraly búgin QR Ortalyq kommýnıkatsııalar qyzmetinde ótken baspasóz máslıhatynda QR Bas prokýratýrasynyń resmı ókili Nurdáýlet Súıindikov málim etti.
Onyń aıtýynsha, elektoraldyq kezeńde azamattardyń konstıtýtsııalyq quqyqtary men saılaý zańnamasynyń saqtalý máseleleri prokýrorlar úshin jumystyń negizgi basymdyǵy bolyp belgilengen.
«Úgitti qosa alǵanda, daýys beriletin kúnniń aldyndaǵy barlyq is-sharalar «Qazaqstan Respýblıkasynyń saılaý týraly» konstıtýtsııalyq zańǵa sáıkes júrgizilgendigin atap ótemiz. Memlekettik organdar tarapynan qandaı da bir zań buzýshylyqtar anyqtalǵan joq. Degenmen, keı jaǵdaıda saılaý aldyndaǵy úgitti júrgizý sharttary buzyldy. Naqty aıtqanda, Shyǵys Qazaqstan oblysynyń Zyrıan aýdanynda prokýratýra ýchaskelik saılaý komıssııasynyń tóraǵasyna qatysty máslıhat depýtattyǵyna kandıdattardyń birin qoldap, saılaý aldynda úgit júrgizgeni úshin ákimshilik is qozǵady. Osyǵan baılanysty ol komıssııa tóraǵasynyń mindetin atqarýdan bosatyldy. Sondaı-aq, sot 30 aılyq eseptik kórsetkish mólsherinde aıyppul túrinde ákimshilik jaýapkershilikke kesti», dedi N. Súıindikov.
Onyń aıtýynsha, Shymkent qalasynyń Qaratal aýdanynda qalalyq máslıhat depýtattyǵyna kandıdattyń úgit materıaldaryn búldirgeni úshin qala turǵyny ákimshilik jaýapkershilikke tartylǵan. Sondaı-aq, saılaýaldy úgitti júrgizý sharttaryn buzý faktileri boıynsha Astananyń 3 turǵynyna zańdy buzýǵa jol berilmeıtindigi týraly aldyn ala eskertýler jasalypty.