Bas prokýratýra: Shý mańyndaǵy poıyz apaty boıynsha eshkim ustalǵan joq

ASTANA. QazAqparat - QR Bas prokýratýrasy Shý mańyndaǵy poıyz apaty boıynsha mashınıstiń ustalǵany týraly aqparattyń jalǵan ekenin resmı túrde málimdedi. Sondaı-aq, quzyrly vedomstvo atalǵan aqparatty taratqan BAQ kózderine jalǵan aqparatty teriske shyǵarýdy suraıdy, dep habarlaıdy QazAqparat tilshisi Bas prokýratýranyń baspasóz qyzmetine silteme jasap.

«Búgin ártúrli aqparattyq agenttikterde «Astana-Almaty» baǵytyndaǵy jolaýshylar poıyzynyń lokomotıvin basqarýshy mashınısti polıtsııanyń ustaǵany týraly jalǵan aqparat tarap ketti. Resmı túrde habarlaımyz: qazirgi ýaqytta sotqa deıingi tergeý amaldary júrgizilip jatyr, onyń barysynda eshqandaı ustap alyp ketý jaǵdaıy júrgizilgen joq», - delingen habarlamada.

Quzyrly vedomstvonyń baspasóz qyzmetiniń habarlaýynsha, QR Investıtsııalar jáne damý mınıstrliginiń janynan atalǵan temirjoldaǵy oqıǵany tergeý boıynsha arnaıy komıssııa qurylǵan. Olarda qajetti aqparat bar.

«Tergeý barysy Bas kólik prokýratýrasynyń baqylaýynda. Qazaqstan Respýblıkasynyń Zańynyń 25-babyna sáıkes (Buqaralyq aqparat quraldary týraly) shyndyqqa sáıkes kelmeıtin aqparattyq taratý boıynsha jaýapkershilik qarastyrylǵanyn aıta ketkimiz keledi. Aqparattyq agenttikterge materıaldardy shyǵarý kezinde jaýapty organdar taratqan resmı kózderge súıenýdi jáne Zańnyń 19, 21 baptary boıynsha buqaralyq aqparat quraldarynda atalǵan oqıǵa boıynsha taraǵan jalǵan aqparatty teriske shyǵarýdy suraımyz», - delingen habarlamada.