Bas prokýratýra ókili zańsyz mıtıng uıymdastyryp, oǵan qatysqandar jazalanatynyn eskertti

ASTANA. QazAqparat - Bas prokýrordyń orynbasary Jandos Ómirálıev «Prokýratýra týraly» Konstıtýtsııalyq zańnyń 40-baby tártibinde úndeý jasady, dep habarlaıdy QazAqparat.

«Áleýmettik jelilerde 2023 jylǵy 9 sáýirde ruqsat etilmegen mıtıngilerdi ótkizýge jáne qatysýǵa shaqyrýlar taratylýda.

Bas prokýratýra mundaı aktsııalardy uıymdastyrǵany jáne qatysqany úshin zańmen belgilengen jaýaptylyq týraly birneshe ret eskertti.

Qoǵamdyq tártipti, halyqtyń ómiri men densaýlyǵynyń qaýipsizdigin qamtamasyz etý, azamattardyń quqyqtary men bostandyqtaryn saqtaý - bizdiń basty basymdyqtarymyz.

Sondyqtan «Qazaqstan Respýblıkasynda beıbit jınalystardy, mıtıngilerdi, sherýlerdi, pıketter men demonstratsııalardy uıymdastyrý jáne ótkizý tártibi týraly» Zańnyń normalaryn saqtaý qajettiligine jáne olardy buzýǵa jol bermeýge taǵy da nazar aýdaramyz.

Buqaralyq jarııa is-sharalar aldyn ala habardar etýmen jáne osy úshin arnaıy bólingen oryndarda jergilikti atqarýshy organdardyń ruqsatyn alýmen halyqtyń tirshiligin qamtamasyz etý obektileriniń qalypty jumys isteýine kedergilerdi boldyrmaıtyn sharalardy qabyldaı otyryp, júrgizilýge tıis.

Kórsetilgen normalar saqtalmaǵan jaǵdaıda kez kelgen jarııa shaqyrýlar zańsyz dep tanylady. Quqyq buzýshylarǵa qatysty quqyq qorǵaý organdary ákimshilik jáne qylmystyq-quqyqtyq sharalar qabyldaıtyn bolady.

Atap aıtqanda, Zań talaptaryn (3-baptyń 3-tarmaǵy) buza otyryp ótkiziletin mıtıngilerdi, sherýlerdi, jınalystardy nemese demonstratsııalardy uıymdastyrý jáne olarǵa qatysý quqyqqa qaıshy bolyp tabylady jáne Ákimshilik quqyq buzýshylyq týraly kodekstiń 488-baby boıynsha 25 táýlikke qamaqqa alýǵa deıin ákimshilik jaýaptylyqqa ákep soǵady.

Osy áreketterdiń nátıjesinde eleýli zalal keltirgeni úshin kináliler Qylmystyq kodekstiń 400-baby boıynsha aıyppul ne 200 aılyq eseptik kórsetkish mólsherinde túzeý jumystary nemese 200 saǵatqa deıingi merzimge qoǵamdyq jumystarǵa tartý ne 50 táýlikke deıingi merzimge qamaqqa alý túrinde qylmystyq jaýaptylyqqa tartylatyn bolady.

Osyǵan baılanysty, Bas prokýratýra qoldanystaǵy zańnamanyń normalaryn múltiksiz saqtaýǵa, arandatýshylyqqa berilmeýge jáne zańsyz aktsııalardy uıymdastyrýdan jáne olarǵa qatysýdan, sondaı-aq olarǵa jarııa túrde shaqyrýdan bas tartýǵa shaqyrady», - delingen Bas prokýratýra ókiliniń úndeýinde.