Bas prokýratýra múgedek balalardy uryp-soǵý oqıǵalaryn rastady

ASTANA. 7 qarasha. QazAqparat - Búginde áleýmettik sala qyzmetkerleri kómek berýdiń ornyna adamgershilikke múldem jatpaıtyn áreketterge barady. Bul týraly búgin múgedekterdiń quqyqtaryn qorǵaý máselelerine arnalǵan alqa májilisinde QR Bas prokýrory Ashat Daýylbaev málim etti.

Onyń habarlaýynsha, qazirgi kezde múgedekter men qarttar úıine túsetin azamattardyń quqyqtaryn qorǵaý salasyndaǵy jaǵdaı syn kótermeıdi. «Prokýrorlar qarttar men múgedekterdiń quqyqtaryn óreskel buzýdyń faktilerin anyqtady. Áleýmettik qyzmetkerler kómek berýdiń ornyna adamgershilikke múldem jatpaıtyn áreketterge barǵan. Tekserister kezinde bıýdjet qarajatyn urlaý men tıimsiz paıdalaný, turǵyn úı, eńbek pen medıtsınalyq kómekkke degen quqyqtardy saqtamaý, azamattardy ońaltý baǵdarlamalarynyń joqtyǵy men der kezinde oryndalmaýy, múgedekterge durys qaramaý, tipti qol jumsaý oqıǵalary anyqtaldy. Mańǵystaý oblystyq psıhonevrologııalyq ınternatynda múgedek balalardy uryp-soǵý áreketteri sonyń bir kórinisi bolsa kerek. Ony beınebaqylaý kameralary túsirip aldy», - dep atap kórsetti A. Daýylbaev.