Bas prokýratýra: Qylmystyq protseste adam quqyǵyn buzý 6 ese ósken

NUR-SULTAN. QazAqparat – QR Palament Májilisinde «Qazaqstan Respýblıkasynda qylmystyq qýdalaý jáne jazany oryndaý salasyndaǵy adam quqyqtary týraly» taqyrybynda ótip jatqan jıynda elde qylmys sany azaıǵanymen ony tergeý kezinde azamattardyń quqyǵyn buzý faktileri eselep óskeni aıtyldy, dep habarlaıdy QazAqparat tilshisi.

Bul týraly QR Bas prokýrorynyń orynbasary Erlik Kenenbaev aıtty.

«Memleket basshysynyń tapsyrmasy boıynsha 2020 jyldan bastap úsh býyndy modeldi kezeń-kezeńmen engizýge kiristik. Bul reforma birneshe sebepterge negizdelgen», - dep bastady Bas Prokýrordyń orynbasary.

Sondaı-aq ol qylmystyq protsester kezinde jol berilgen zańsyzdyqtar boıynsha prokýratýra organdarynyń keshigip áreket etetini týraly syn kóp aıtylǵanyn eske aldy.

«Qazaqstanda sońǵy 6 jylda qylmys sany 2,5 ese tómendegen. Biraq, sonymen qatar, qylmystyq protseste azamattardyń quqyqtaryn buzý 6 ese ósken. Qoǵam tergeý jumysynyń sapasyna narazy boldy. Bizge isti sozbalańǵa salý, ókilettikti teris paıdalaný týraly shaǵymdardyń sheksiz aǵyny kelip jatty. Bizdiń tarapymyzǵa bul turǵydaǵy zań buzý faktilerine «postfaktým» rejımde nazar aýdarǵan degen syn aıtyldy.

Prokýrorlar tergeý materıaldarymen tek isti sotqa joldardyń aldynda ǵana nemese is irkilgende jáne toqtatylǵan kezde ǵana tanysyp keldi. Basqasha aıtsaq, prokýorlar sotqa deıingi tergeý isterine formaldy túrde ǵana aralasyp kelgen edi», - dedi Erlik Kenenbaev.

Onyń aıtýynsha, qylmystyq protsedýralardyń úsh býyndy modeli engizile bastaǵan tustan beri prokýrorlardyń zań aıasyndaǵy múmkindigi artqan.