Bas prokýratýra kisi óltirmek bolǵan adamdy Koreıa Respýblıkasynan ekstradıtsııalady

<p>ASTANA. KAZINFORM - Búgin Bas prokýratýra men QR ІІM Interpolynyń qyzmetkerleri Qazaqstan Respýblıkasynyń Koreıa Respýblıkasyndaǵy Elshiliginiń kómegimen kisi óltirýge oqtalǵan kúdiktini qylmystyq jaýaptylyqqa tartý úshin ekstradıtsııalady.</p>

QR Bas prokýratýrasy baspasóz qyzmetiniń habarlaýynsha, atalǵan tulǵa 2022 jyldyń naýryz aıynda Túrkistan oblysynyń Saýran aýdanynda aýyldasymen janjaldasyp, arty tóbeleske ulasqan.

Tóbeles barysynda kúdikti qarsylasynyń keýde tusynan birneshe ret pyshaq suqqan. Der kezinde kórsetilgen medıtsınalyq kómektiń arqasynda jábirlenýshi aman qaldy.

Qylmys jasaǵannan keıin kúdikti Koreıa Respýblıkasynyń aýmaǵynda jasyrynyp júrgen jáne bıyl maýsym aıynda sonda ustalǵan.

Qazir ol Astana qalasyndaǵy tergeý ızolıatorynda jatyr.

Kúdikti segiz jyldan on bes jylǵa deıingi merzimge bas bostandyǵynan aıyrylýy múmkin.

Aıta ketý kerek, kúdiktini ekstradıtsııalaý Qazaqstan Respýblıkasynyń Bas prokýratýrasy ázirlegen Qazaqstan Respýblıkasy men Koreıa Respýblıkasy arasyndaǵy 2003 jylǵy 13 qarashadaǵy ustap berý týraly shartynyń arqasynda múmkin boldy.