Bas prokýratýra qazaqstandyqtarǵa jadynama ázirledi

NUR-SULTAN. QazAqparat – Qazaqstannyń Bas prokýratýrasy azamattardyń ótinishterin qaraý erekshelikteri týraly arnaýly jadynama ázirledi, dep habarlaıdy QazAqparat tilshisi.

Osy oraıda Bas prokýratýra bul jadynama júgingen azamattardyń problemalaryn jedel sheshýge septigin tıgizetindegine úmit artyp otyr.

«Azamattar ózderiniń problemasy tezirek sheshilýi úshin memlekettik organdardyń quzyretin bilýi kerek. Sondaı-aq prokýror sot sheshimderiniń barlyǵyna birdeı narazylyq bildirýge quqyly emes», - dep atap ótedi vedomstvodan.

Qujatta qandaı ótinishtiń prokýratýra qaraýyna jatatyny, al qandaı olardyń quziretine kirmeıtindigi naqty jazylǵan.

«Prokýratýra týraly» QR Zańynda qadaǵalaýdy júzege asyrý kezinde prokýratýra organdary ózge de memlekettik organdardyń fýnktsııalaryn almastyrmaıtyndyǵy jazylǵan. Osyǵan oraı prokýrorlar ózin ózi qorǵaı almaıtyn adamdardyń, shektelmegen adamdar qatarynyń múddelerinde, sondaı-aq orny tolmas saldarlar qateri kezinde, memlekettik organdardyń áreketsizdigi jaǵdaıynda olardyń shaǵymdaryn qaraıdy. Al bul sanatqa jatpaıtyn shaǵymdar basqa ákimshilik organnyń qaraýyna jiberiledi.