Bas prokýratýra: Qazaqstanda týberkýlezdi emdeýde buzýshylyqtar anyqtaldy

ASTANA. QazAqparat - Prokýratýra organdary medıtsınalyq uıymdar men mekemelerdiń týberkýlez profılaktıkasy boıynsha sharalardy iske asyrýy jaıyna tekseris júrgizdi, dep habarlady QR Bas prokýratýrasynyń baspasóz qyzmeti.

"Jalpy tekserý nátıjesinde, týberkýlez aýyrýyna shaldyǵý kúdigi bar adamdardyń tekserilýi ýaqtyly júrgizilmegen, tolyq tekserilmegen jáne t.b. 1028 derek anyqtaldy. Kórsetilgen faktorlar saý adamdarǵa tikeleı qaýip tóndiredi», - dep túsindirdi vedomstvoda. .

Bas prokýratýranyń málimetshe, tekserý barysynda birqatar buzýshylyqtar anyqtaldy, olar statıstıka aqparatyn burmalaý, profılaktıkalyq is-sharalardyń tıisti deńgeıde uıymdastyrylmaýy, sapasyz dárigerlik qyzmet kórsetý, naýqastardy májbúrlep emdeý sharalaryn qamtamasyz etpeý jáne t.b.

Mysalǵa, Talǵar aýdanynyń (Almaty oblysy) ortalyq emhanasynda tekserý kúni 78 emdelýshiniń flıýorografııasy oń nátıje kórsetkenimen, tolyqtaı tekserilmegeni anyqtaldy.

Áýlıekól aýdanynyń (Qostanaı oblysy) ortalyq emhanasyna týberkýlezge tekserýi qajet aýrý belgilerimen az.«O» bes aıy boıy birneshe ret qaralýǵa kelgen (2015 jylǵy 28 mamyr, 8 tamyz jáne 14 qazan).

«Soǵan qaramastan, dárigerler aýrýǵa saqtyqpen qaramaǵan, nátıjesinde 22 qazanda ol týberkýlezge qarsy aýrýhanaǵa jatqyzylyp, 4 qúnnen keıin týberkýlez aýrýynyń asqynýynan jan tapsyrǵan.

Atalǵan fakti boıynsha sot aldyndaǵy tergeý sharalary júrgizýde», - delingen habarlamada.

Tekserýler nátıjesinde emdelýden bas tartyp, ońashalaýdy qajet etetin, eldi mekenderde júrip basqa adamdarǵa aýrýyn juqtyrý qaýpin tóndirip júrgen 327 naýqas anyqtaldy. Qoldanylǵan sharalarmen 259 naýqas emdelýge qaıtaryldy, qalǵandary izdestirilýde.

Densaýlyq saqtaý jáne áleýmettik damý mınıstrligi zań buzýshylyqty jáne onyń sebepterin joıý týraly engizilgen usynysty qaraý nátıjesinde profılaktıkalyq jumystaǵy nemquraıdylyqty boldyrmaı, halyqtyń densaýlyǵyn qamtamasyz etýge baǵyttalǵan sharalar qabyldanýda, dep atap ótti Bas prokýratýra.