Bas prokýratýra qańtar oqıǵasyn tergeý barysyna zańsyz aralasyp jatqandar týraly aıtty
«Qazirgi ýaqytta jekelegen adamdar áleýmettik jeliler men buqaralyq aqparat quraldary arqyly zańsyz talaptar qoıyp otyr. Olar qabyldanǵan protsestik sheshimdermen kelispegendikten, tergeýge qysym kórsetý maqsatynda qylmystyq isterdi tergeý barysyna aralasyp jatyr», - dedi Eldos Qılymjanov Ortalyq kommýnıkatsııalar qyzmetinde.
Osy oraıla ol qylmystyq-protsestik zańnamanyń talaptaryna sáıkes, tergeý áreketterine qatysý boıynsha adamdardyń naqty tizbesine ruqsat etilgenin eske saldy. Olardyń qatarynda advokattar, qorǵaýshy taraptyń zańdy ókilderi, jábirlenýshiler bar. Bul adamdardyń prokýratýraǵa da, tergeý sotyna da tergeý organynyń is-áreketterine ótinishhat nemese shaǵym berýge quqyǵy bar.
Bul turǵyda Qylmystyq-protsestik kodeksinde protsestik sheshimderge shaǵym jasaýdyń naqty tártibi aıqyndalǵan.
«Osyǵan baılanysty qylmystyq protseske qatysýshylar men qorǵaýshylardy Zańnyń kórsetilgen normalaryn qatań saqtaýǵa shaqyramyn. Prokýratýra organdary barlyq qylmystyq ister boıynsha qylmystyq-protseske qatysýshylardyń quqyqtaryn saqtaýdy qamtamasyz etip otyrǵanyn atap ótemin. Qylmystyq isterdi tergeý kezinde quqyq qorǵaý jáne arnaıy organdardyń qyzmetine aralasqany úshin jaýaptylyq týraly Bas prokýratýra birneshe ret eskertkenin erekshe aıtyp ótkim keledi. Ózge adamdardyń sotqa deıingi tergeý barysyna aralasý áreketi úshin ákimshilik jáne qylmystyq jaýaptylyq qarastyrylǵan», - dedi Bas prokýratýranyń ókili.
Budan buryn habarlanǵandaı, qazirgi kezde arnaıy prokýrorlardyń is júrgizýinde jappaı tártipsizdikter boıynsha 53 jáne terrorızm aktilerine qatysty 32 qylmystyq is bar .
Memlekettik obektilerdi órtteý, múlikterdi joıý jáne terrorızm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.
Foto: ortcom.kz