Bas prokýratýra qańtar oqıǵasy kezinde urlanǵan qarý týraly aıtty

ASTANA. QazAqparat – QR Bas prokýratýrasy Qylmystyq qýdalaý qyzmeti basshysynyń orynbasary Eldos Qılymjanov qańtarda polıtsııadan urlanǵan qarý jaıynda aıtty, dep habarlaıdy QazAqparat tilshisi.

Onyń aıtýynsha, bıyl qańtarda quqyq qorǵaý organdary ǵımarattarynan 1 259 tabeldik qarý urlanyp, sonyń ishinde avtomattar, tapanshalar bar.

«Atap aıtqanda, Almaty oblysynda Polıtsııa departamenti ǵımaratynan 53 avtomat, 367 tapansha, 1 granatomet, sondaı-aq 20 myńnan astam patron urlandy», - dedi E. Qılymjanov Ortalyq kommýnıkatsııalar qyzmetindegi brıfıngide.

Onyń sózine qaraǵanda, Jambyl oblysynda 200 avtomat, 148 tapansha, 11 granatomet, bir pýlemet jáne 40 myńǵa jýyq patron urlandy.

«Rezıdentsııada oıran salýdan keıin 130 qarý men oq-dáriniń jetispeıtini anyqtaldy. Onyń ishinde 80 granata, 17 tapansha, 11 avtomat, 21 granatomet jáne snaıper myltyǵy bar. Atalǵan qarýdy keıinnen qylmyskerler beıbit turǵyndar men quqyq qorǵaý qyzmetkerlerine qarsy qoldandy», - dedi Bas prokýratýra ókili.