Bas prokýratýra ǵımaratynda quqyq qorǵaý qyzmetteriniń ortalyǵy ashyldy

ASTANA. QazAqparat -Bas prokýratýranyń ǵımaratynda halyqqa quqyq qorǵaý qyzmetterin kórsetetin biregeı ortalyq ashyldy. Jańa ortalyqta advokattar, medıatorlar, notarıýstar, probatsııa qyzmetkerleri men psıhologtar jumys atqaratyn bolady, dep habarlaıdy «QazAqparat» HAA tilshisi.

Bas prokýratýranyń janynan ashylǵan ortalyqtyń búgin tusakeseri bolyp ótti. Onyń jalpy aýdany myń sharshy metrge jýyq alańdy qamtyp, zamanǵa saı ınjenerlik-tehnıkalyq jabdyqtarmen, elektrondyq kezek júıesimen, «Connection Point» óz-ózine qyzmet kórsetý sektorymen, sondaı-aq kútý zaly men ózge de qajetti kabınettermen qamtylǵan.

Atalǵan ortalyqta azamattarǵa tájirıbeli prokýrorlar quqyq kómek kórsetedi. Aryz-shaǵymdardy ýaqtyly ári tıimdi sheshý úshin bul jumysqa ózge de zańgerler tartylady.

Ortalyqtyń kire berisinen-aq ulttyq naqyshqa basa mańyz berilip, ǵımarat oıý-órnektermen bezendirilgen. Aryzdanýshy aldymen tańdalyp alynǵan operatorlardan aqyl-keńes ala alady. Sonymen birge, adamdarǵa prokýratýra basshylyǵyna beınejazba arqyly ótinishin jetkize alatyn jeke kabınet qarastyrylǵan. Ortalyqta 4 prokýror qyzmetkeri kún boıy azamattardan aryz qabyldaıdy. 2 advokat otyratyn da arnaıy kabınet bar. Notarıýs qyzmeti áleýmettik az qamtylǵan adamdarǵa tegin qyzmet kórsetedi. Sottalǵan jandarǵa jumyspen qamtýǵa kómektesetin probatsııa kabıneti men taraptardy tatýlastyratyn medıatsııa kabıneti tańerteńnen keshke deıin ashyq. Ortalyqta sondaı-aq, ujym aryzdanǵan jaǵdaıda yńǵaıly bolatyn konferentsııa zaly da bar.

«Memlekettik nemese quqyq qorǵaý organdarynda máselesi sheshilmeı kelgen adamdar bizdiń ortalyqta kúrmeýi qıyn sharýalaryna sheshim tabar degen oıdamyz. Ashýlanyp, qınalyp kelgen adamdarǵa psıhologtar járdemdesedi. Eń bastysy, úmitpen kelgen adam senimmen shyqqanyn kózdeımiz», - deıdi Bas prokýratýranyń janynan ashylǵan quqyq qorǵaý qyzmetteri ortalyǵynyń basshysy Saǵatbek Súleımen.