Bas prokýratýra Frantsııanyń Áblıazovty elden shyǵarý uıǵarymyna pikir bildirdi

ASTANA. QazAqparat – Bas prokýratýrada Muhtar Áblıazovke 30 kúnnen keıin Frantsııadan shyǵý uıǵarymy berilgeni týraly aqparat joq, dep habarlaıdy QazAqparat tilshisi.

«Qazaqstan Respýblıkasynyń Bas prokýratýrasy Frantsııa bıliginiń M.Áblıazovty elden shyǵarý týraly sheshim qabyldady delingen aqparatqa qatysty bul derekti rastaıtyn nemese teristeıtin senimdi málimetiniń joq ekendigin habarlaıdy», - dep atap ótti atalǵan vedomstvo agenttiktiń resmı saýalyna oraı.

Bas prokýratýra sheteldik azmattardy elden shyǵarý máselesi, olardyń kóshi-qon zańnamasyn saqtaýy Frantsýz Respýblıkasynyń ǵana ishki isi ekendigin atap ótedi.

Memlekettik organnyń atap ótýinshe, Muhtar Áblıazov uıymdasqan qylmystyq toptyń quramynda birqatar aýyr jáne asa aýyr qylmys jasaǵany úshin Qazaqstannyń quqyq qorǵaý organdary tarapynan izdeýde júr. Bas prokýratýra ókiletti organ retinde Áblıazovty ekstradıtsııalaý boıynsha qylmystyq protsessýaldyq zańnamada jáne halyqaralyq sharttarda kózdelgen sharalardy qabyldap jatyr.

«Buǵan qosa, QR Qylmystyq protsessýaldyq kodekstiń 201-baby 1-tarmaǵyna sáıkes, atalǵan sotqa deıingi tergeý, onyń ishinde qylmystyq is boıynsha halyqaralyq quqyqtyq yntymaqtastyqqa qatysty málimetter jarııa etýge jatpaıdy. Sondyqtan sizderdiń saýaldaryńyzǵa qatysty jan-jaqty aqparat qazirgi ýaqytta berilmeıdi», - dep túsindiredi vedomstvodan.