Bas prokýratýra eldegi sý tasqynyna baılanysty jedel keńes ótkizdi

<p>ASTANA. KAZINFORM &mdash; Búgin Bas prokýratýrada sý tasqyny jaǵdaıy boıynsha barlyq múddeli organdardyń jumyldyrylyýymen vedomstvoaralyq jedel keńes ótti. Tótenshe jaǵdaılar mınıstrliginiń ókili aǵymdaǵy jaǵdaıdy baıandady.</p>

Sý tasqynynyń joǵary qaýpi Aqmola, Aqtóbe, Shyǵys Qazaqstan, Batys Qazaqstan, Qostanaı, sondaı-aq Abaı, Ulytaý oblystaryna tónip tur.

«Respýblıkalyq jáne 12 oblystyq shtab ornalastyryldy. Senim telefony jumys istep tur. Táýlik boıy kezekshilik uıymdastyryldy. Jergilikti ákimdikter, polıtsııa sondaı-aq tótenshe jaǵdaılar organdary sý basqan nysandardy soryp alý jáne habarlamalardy qalpyna keltirý boıynsha shuǵyl jumystar júrgizip jatyr. 94 adam evakýatsııalandy. Barlyǵy 2,5 myń qyzmetker men 693 tehnıka, 288 sýdy soryp alý qondyrǵylar jumyldyryldy. Qabyldanǵan sharalarǵa qaramastan, atalǵan aımaqtarda turǵyn úılerdi, aýla aýmaqtaryn jáne jertólelerdi sý basqan. Joldy shaıyp ótýdiń 7 jaǵdaıy tirkeldi», — delingen habarlamada. 

Mamandardyń aıtýynsha, aýa raıynyń turaqsyzdyǵyn eskere otyryp, sonyń ishinde nóserli jańbyr, aýa temperatýrasynyń kóterilýi, aldaǵy kúnderi sý basý qaýpi saqtalady. Sondyqtan keńeste gıdrotehnıkalyq qurylystardyń jaı-kúıi, eldi mekenderdi, joldar men kópirlerdi ınjenerlik qorǵaý, turǵyndardy ýaqtyly evakýatsııalaýdy qamtamasyz etý, evakýatsııalaý pýnktteriniń daıyndyǵy, alǵashqy medıtsınalyq-áleýmettik kómek kórsetý máseleleri de talqylandy. Halyqty eskertý júıeleriniń (sırenalar, jergilikti eskertý júıeleri jáne t. b.) úzdiksiz jumysyn qamtamasyz etý qajettiligine erekshe nazar aýdarylady. Óz kezeginde polıtsııa organdary tasqyndy joıý jumystary kezinde qaýipsizdik pen quqyqtyq tártipti qamtamasyz etýge baǵyttalǵan.

Keńes qorytyndysy boıynsha oblys prokýrorlary men ýákiletti memlekettik organdarǵa birlesip turǵyndardan túsetin sıgnaldarǵa barynsha den qoıý jáne sý tasqynynan zardap shekken adamdarǵa kómek kórsetýge jedel sharalar qabyldaý qajettigi aıtyldy.