Bas prokýratýra: Byltyr 30-dan astam polıtseı túrmede azaptaý ádisterin qoldanǵany úshin sottaldy

ASTANA. QazAqparat - Byltyr azaptaý áreketterine jol bergen 30-dan astam polıtseı sottaldy. Bul týraly búgin Astanada ótip jatqan memlekettik organdardyń azaptaýǵa qarsy ulttyq preventıvtik tetikter qatysýshylarymen ózara is-qımylyna qatysty konferentsııada QR Bas prokýrorynyń orynbasary Jaqyp Asanov málim etti.

"Sońǵy jyldary qolǵa alynǵan sharalardyń negizinde azaptaý faktileri boıynsha túsken aryz-shaǵymdardyń sany 100 esege artty. Qylmystyq úderiske tartylǵan taraptar qorqynyshtan aryldy, quqyqtyq ádildikke sene bastady. Sonyń nátıjesinde azaptaý ádisterin qoldanǵan quqyqqorǵaý organdary qyzmetkerleriniń sany artty. Eger 2008 jyly osyǵan qatysty 3 qylmystyq is qozǵalyp, 1 qyzmetker sotty bolsa, 2013 jyly azaptaý ádisterin qoldaný faktileri boıynsha 35 qylmystyq is qozǵalyp, 31 polıtsııa qyzmetkeri sottaldy", - dep atap ótti ol.

Onyń sózine qaraǵanda, bul qylmystyq saıasatty túbegeıli ózgertýdiń nátıjesinde jáne memlekettiń osy oraıdaǵy naqty qadamdary arqasynda múmkin bolǵan.