Bas prokýratýra: Bıyl jumys berýshiler 2,5 myńnan astam jazataıym oqıǵalardy jasyrýǵa tyrysqan

ASTANA. QazAqparat - Bıyl jumys berýshiler jasyrýǵa tyrysqan 2,5 myńnan astam jazataıym oqıǵalar anyqtaldy. Bul týraly búgin Astanadaǵy Halyqaralyq adam quqyqtary kúnine arnalǵan dóńgelek ústelde QR Bas prokýrorynyń orynbasary Andreı Kravchenko málim etti.

«Jalaqyny keshiktirip berý máselesinen bólek, bizdi árdaıym jumysshylardyń eńbek jaǵdaıyn tıisti deńgeıde qamtamasyz etpeý alańdatady. Sondyqtan da prokýratýra organdary tarapynan óndiristik jaraqattaný jaǵdaılary kezinde zańdylyqty saqtaýǵa tekserýler júrgiziledi. Bıyl biz 2,5 myń jazataıym oqıǵany anyqtadyq, ıaǵnı bul turǵyda jumys berýshiler kásiporyndarda bolǵan jaǵdaı týraly eńbek ınspektsııalaryna habarlamaǵan»,-dedi A. Kravchenko.

Osy oraıda ol keıbir iri bıznes sýbektileri qolaıly eńbek jaǵdaıyn qamtamasyz etý boıynsha sharalardy qabyldamaıtyndyǵyn jáne adamdar kún saıyn ómirine shynaıy qaýip týdyratyn jaǵdaıda jumys isteýge májbúr ekendigin atap ótti.

«Sondyqtan da prokýrorlar osyǵan aralasyp, bul zań buzýshylyqtardyń jolyn kesýde»,-dep túıdi A. Kravchenko.