Bas prokýratýra Almatydaǵy qańtar oqıǵasyna belsene qatysqandar jaıly aıtty

NUR-SULTAN. QazAqparat – QR Bas prokýratýrasynyń 1 qyzmet bastyǵynyń orynbasary Eldos Qılymjanov ortalyq kommýnıkatsııalar qyzmetinde ótken brıfıngide Almatydaǵy qańtar oqıǵasyna belsendi qatysqandardy atady, dep habarlaıdy QazAqparat tilshisi.

«Almaty qalasynda 25 naýryzda Sh. esimdi azamat qamaýǵa alyndy. Ol qaıǵyly qańtar kezinde «Anna» qarý-jaraq dúkeninen vıntovkany jymqyryp, áýejaıǵa polıtsııa departamentine jáne Almaty qalasy, Almaly aýdanynyń polıtsııa basqarmasyna shabýyl jasady. Quqyq qorǵaý organdary N. esimdi azamatty anyqtady. Ol aǵymdaǵy jyldyń 5 qańtarynda bir top adammen birge «Qazaeronavıgatsııa» ǵımaratyn basyp aldy jáne Almaty qalasy áýejaıynyń ushý-qoný jolaǵynyń jaryǵyn óshirdi», - dedi Bas prokýratýra ókili.

Onyń aıtýynsha, Almaty qalasy ákimdiginiń aldyndaǵy tártipsizdikti uıymdastyrdy degen kúdikpen Almaty oblysynyń turǵyndary da ustalǵan.

«Arnaıy prokýrarlar aǵymdaǵy jyly 4 sáýirinde Almaty qalasy ákimdiginiń aldynda jappaı tártipsizdik uıymdastyrǵany úshin Almaty oblysynyń 10 turǵynyn ustady», - dedi Eldos Qılymjanov.

Shara barysynda ol jappaı tártipsizdikke 12 uıymdasqan qylmystyq toptyń qatysqanyn málim etti.