Bas prokýratýra aqylǵa syımaıtyn tekseristerdi jarııalady

ASTANA. QazAqparat - Bas prokýratýra men «Atameken» ulttyq palatasy kásipkerlerge qatysty aqylǵa syımaıtyn sanıtarlyq-epıdemıologııalyq talaptardy azaıtýǵa kiristi, dep xabarlaıdy QazAqparat tilshisi.

«Ondaı talaptar kóp. Kóbisi eskirgen, tipti eshqandaı logıkaǵa saı kelmeıdi. Máselen, qoǵamdyq tamaqtaný oryndaryna qatysty talaptarǵa sáıkes, qara nan jáne aq nan bólek saqtalýy qajet. Al astyńǵy jáne ústińgi sórelerdiń araqashyqtyǵy, kem degende, 35 santımetr bolýy shart. Sol sııaqty turǵyn úılerde ornalasqan nysandarǵa túngi ýaqytta azyq-túlikti kirgizýge ruqsat joq. Endi, ondaı talaptar múldem aqylǵa syımaıdy. Tutynýshylar úshin qara men aq nan bólek jatty ma, birge saqtaldy ma, báribir emes pe? Al ol nannyń eki túrin bir-birine tıgizbeımiz desek, tsellofanǵa da salyp, saqtaýǵa bolady ǵoı. Dúkende de solaı istemeı me? Al, endi, nandy bólek saqtap, onyń araqashyqtyǵyn santımetrmen ólsheý degen logıkaǵa saı kelmeıdi», - dedi Bas prokýratýranyń departament basshysy Marat Seksembaev kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda.

Onyń aıtýynsha, búginde Bas prokýratýra, «Atameken» ulttyq palatasy men Ulttyq ekonomıka mınıstrligi birlese otyryp, aqylǵa syımaıtyn ondaı talaptardy qysqartý jumysyna kiristi.

Resmı málimetke sáıkes, ótken jyly sanıtarlyq-epıdemıologııalyq baqylaý salasyndaǵy tekseristerdiń tek 43 paıyzy ǵana rastaldy.