Bas múftı Rım Papasy Frantsıskpen kezdesti

NUR-SULTAN. QazAqparat - Búgin Qazaqstan musylmandary Dinı basqarmasynyń tóraǵasy, Bas múftı Naýryzbaı qajy Taǵanuly Vatıkan men Katolık shirkeýiniń basshysy Rım Papasy Frantsıskpen kezdesti, dep habarlaıdy QazAqparat basqarmanyń resmı saıtyna silteme jasap.

Kezdesýde ózara senim men syı-qurmet, konfessııaaralyq kelisim men dinaralyq dıalogtyń yntymaqtastyqqa dem beretini aıtyldy. Sondaı-aq elordada ótip jatqan sezdiń dinaralyq dostyqty nyǵaıtýdaǵy róli sóz boldy.

Rım papasy Frantsısk beıbitshilik pen ózara túsinistikke shaqyratyn bastamalardyń, sonyń ishinde Qazaqstanda ótip jatqan Álemdik jáne dástúrli dinder kóshbasshylary seziniń álemdi birlikke shaqyrýdaǵy orny joǵary ekenin atap ótti.

Aıta keteıik, búgin elordadaǵy Táýelsizdik saraıynda Álemdik jáne dástúrli dinder kóshbasshylarynyń VII sezi bastaldy.

Alqaly jıynǵa Qazaqstan Prezıdenti Qasym-Jomart Toqaev qatysyp, Qazaqstan úshin álemniń eń qurmetti rýhanı kóshbasshylaryn birge jınap, dıalog ornatý úlken qurmet ekenin atap ótti.

Foto: www.muftyat.kz