Bas múftı Oraza kezinde azyq-túlik baǵasyna jeńildik jasaýdy usyndy

NUR-SULTAN. QazAqparat – Qazaqstan musylmandary dinı basqarmasynyń tóraǵasy, elimizdiń bas múftıi Naýryzbaı qajy Taǵanuly Oraza aıynda azyq-túlik baǵasyna jeńildeý jasaýǵa shaqyrdy, dep habarlaıdy QazAqparat tilshisi.

«Ramazan aıynda adamdarǵa kóp jaqsylyqtar jáne múmkindikter beriledi. Bul týraly ardaqty Paıǵambarymyz Muhammed (oǵan Allanyń salaýaty men sálemi bolsyn): «Bul aıda jánnat esikteri ashylady», «Oraza tutqan adamnyń aldyńǵy jáne keıingi kúnálary keshiriledi», - degen súıinshi habar jetkizgen. Endeshe, qasıetti aıda kóbirek saýapty amal jasaýǵa asyǵaıyq, aǵaıyn. Ata-anamyzdyń, qazynaly qarttarymyzdyń duǵasy men alǵysyn alýǵa tyrysaıyq», - dedi Naýryzbaı qajy Taǵanuly ortalyq kommýnıkatsııalar qyzmetinde ótken baspasóz máslıhatynda.

Sondaı-aq, bas múftı qazaqstandyqtardy múmkindikke qaraı, muqtaj jandarǵa qol ushyn berip, naýqastyń kóńilin surap, saýap alýǵa shaqyrdy.

«Osy rette kásipker azamattardy qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa shaqyramyn. Biz qashan da ózgelerge qaıyrymdylyq jasap, aınalamyzǵa shýaǵymyzdy tógip, sharapatymyzdy tıgizip, adamnyń alǵysyn alyp ósip-óngen elmiz. Halqymyzda «Qaıyrymdylyq jasasań – qaıyryn óziń kóresiń» degen naqyl sóz bar», - deıdi ol.

Buǵan deıin basqarma tóraǵasy bıylǵy Orazanyń Ózbekstan, Qyrǵyzstan elderimen keńesip belgileýdiń sebebin túsindirdi.

Odan bólek, basqarma jynanyn dinı aqparat berý ortalyǵy ashylǵany habarlandy.