Bas múftı meshitke keletin jamaǵatqa úndeý tastady
«Alla qalasa 18 mamyrda jeke qulshylyq jasap, quran oqytyp, neke qıdyrýǵa nıet bildirgen azamattar úshin meshitterimizdi ashamyz. Bul elimizdegi barlyq meshittiń esigi ashylady degen sóz emes. Óıtkeni ár oblystaǵy karantın jaǵdaıy ártúrli. Bas sanıtarlyq dárigerdiń karantın rejımin kezeńdik talaptaryn saqtaý boıynsha qaýlysyn ustanýdamyz. Sonymen qatar óńirlerdegi koronavırýs ınfektsııasynyń taralýyna jol bermeý jónindegi jedel shtabtyń qaýlysyna sáıkes jumys júrgizemiz. Osyǵan oraı oblystaǵy meshitterimizdiń ashylýy – sol óńirlerdegi koronavırýs ınfektsııasynyń taralýyna jol bermeý jónindegi jedel shtabtyń qaýlysyna sáıkes júzege asyrylady», - dedi Bas múftı OKQ-da ótken baspasóz máslıhatynda.
Onyń aıtýynsha, karantın talaptaryn saqtaý úshin jamaǵatpen oqylatyn bes ýaqyt, juma, taraýyq namazdaryna qatysty ýaqytsha shekteýler óz kúshinde qalady.
«Jamaǵatpen oqylatyn namazdardyń merzimin aldaǵy ýaqytta qosymsha habarlaımyz. Qasıetti kitabymyz Quranda «Qıyndyqpen birge jeńildik ber. Alla sizderge jeńildikti qalaıdy» degen. Allaǵa shúkir, elimizde TJ rejımi aıaqtalyp, halqymyz qalypty ómirge aýysa bastady. Alaıda karantın talaptaryn qatań saqtap, saqtyq sharalaryn asa mán berýimiz kerek», - dedi ol.
Naýryzbaı qajy Taǵanuly meshitke kelýshilerge kelesi talaptardy saqtaýǵa shaqyryp, úndeý tastady:
- meshitke kelýshi barsha jamaǵatty medıtsınalyq maska jáne qolǵap kıip kelýge;
- antıseptık quralyn jıi qoldanýǵa;
- jeke qulshylyq jasaý kezinde bir jarym metr ara qashyqtyqty saqtaýǵa;
- Quran oqıtyn bólmede bir jarym metr qashyqtyqty saqtap otyryp, on adamnan artyq kirmeýge;
- neke qıdyratyn bólmege tórt adamnan artyq kirmeýge;
- meshit ımamdarynyń keńesine qulaq asyp, meshitke lek-legimen, kezekpen kirýge;
- meshitke 15 mınýttan artyq bolmaýǵa (meshit aýasyn ár úsh saǵat saıyn tazartyp otyrý úshin).