Bas múftı maqtaaraldyq úsh otbasyǵa baspananyń kiltin tabys etti

MAQTAARAL. QazAqparat – Qazaqstan musylmandar dinı basqarmasynyń tóraǵasy, Bas múftı Naýryzbaı qajy Taǵanuly sý tasqyny bolǵan Maqtaaral aýdanyna kelip, turǵyndarmen kezdesti. Topan sýdan zardap shekken aýyl turǵyndarynyń qazirgi jaǵdaıymen tanysty, habarlaıdy QazAqparat tilshisi.

«Nur Otan» partııasy oblystyq fılıaly tóraǵasynyń birinshi orynbasary Beısen Tájibaev Bas múftıge sý alǵan aýyldar men evakýatsııalyq beketterde júrgizilip jatqan jumystarymen tanystyrdy. Naýryzbaı qajy Taǵanuly Maqtaaral aýyldyq okrýgi men Atakent kentindegi evakýatsııalyq beketterde bolyp, sonda ýaqytsha ornalastyrylǵan turǵyndarǵa aýyzasharǵa arnap «Ramazan táttisin» usyndy. Alyp kelgen 30 tonna undy ortalyq qoımaǵa tabystap, oblystyq qaıyrymdylyq qoryna kómek retinde aýdarylatyn 10 mln teńgeniń sertıfıkatyn tabystady.

«Apat aıtyp kelmeıdi. Jaratýshy bizge osyndaı synaq bergen eken. Endeshe sabyr saqtaı otyryp, synan súrinbeı ótýdi jazsyn dep tileıik. Ózderińiz biletindeı, elimizdiń túkpir-túkpirinen kóptegen kómek arqyly barsha halyq qoldaý tanytyp jatyr. Kómek qolyn sozyp maqtaaraldyqtarmen birge ekenin bildirip jatqan barlyq azamattarǵa Alla razy bolsyn. «Árbir istiń qaıyry bolady» demekshi Alla qalasa Úkimet tarapynan salynyp jatqan sý jańa úılerge qonystanatyn bolasyzdar. Budan keıin qýanyshty kúnder kóp bolsyn», - dedi Bas múftı.

Sapar sońynda Naýryzbaı qajy Jetisaı aýdanynda bolyp, «Baspanaǵa jol» qaıyrymdylyq qory esebinen salynǵan 3 birdeı úıdiń kiltin áleýmettik az qamtylǵan otbasylarǵa saltanatty túrde tabys etti.