Bas múftı Qurban aıt qarsańynda kásipkerlerge úndeý jasady

<p>ASTANA. KAZINFORM &mdash; Astanada Qurban aıt merekesine baılanysty ótken baspasóz máslıhatynda Bas múftı Naýryzbaı qajy Taǵanuly kásipkerlerge úndeý jasady<strong>.</strong></p>

QMDB baspasóz qyzmetiniń málimetinshe, Naýryzbaı qajy Taǵanuly kásipkerlerden Qurban aıtta mal baǵasyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa shaqyrdy. 

Foto: muftyat.kz

«Biz qashanda ózgelerge qaıyrymdylyq jasap, aınalamyzǵa shýaǵymyzdy tógip, úlkenderdiń alǵysy men batasyn alyp, ósip-óngen elmiz. Halqymyzda «Qaıyrymdylyq jasasań – qaıyryn óziń kóresiń» degen naqyl sóz bar. Paıǵambarymyz Muhammed (oǵan Allanyń salaýaty men sálemi bolsyn): «Kimde kim baýyrynyń qajetin ótese, Alla onyń qajetinde bolady. Kimde kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», – degen. Osy rette elimizdegi barsha kásipker azamattardy Qurban aıttyń qurmetine mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa shaqyramyn. Qurban aıtty atap ótýdiń negizgi maqsaty – musylmandar arasynda ózara meıirimdilik, jomarttyq, qaıyrymdylyq, qanaǵat syndy adamgershilik qundylyqtardy qalyptastyrý. Allanyń raqym nury tógiletin berekeli sátterde halqymyzǵa jaqsylyq jasap, kópshiliktiń rızashylyǵyna bóleneıik», - dep atap ótti Naýryzbaı qajy Taǵanuly.

Qazaqstan musylmandary dinı basqarmasy Qurban aıt meıramyna qatysty túsinik bergen edi.