Bas múftı «Biz_birgemiz» atty qaıyrymdylyq kerýenine qatysty

NUR-SULTAN. QazAqparat - Naýryz meıramyna oraı Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elorda ımamdarymen birge «Biz_birgemiz» atty qaıyrymdylyq kerýenine qatysty, dep habarlaıdy QazAqparat tilshisi.

Dinı basqarmanyń málimetinshe, Elbasy Nursultan Nazarbaev pen Memleket basshysy Qasym-Jomart Toqaevtyń osynaý qıyn sátte elge qaıyrymdylyq baǵytta úles qosaıyq degen úndeýine Áziret Sultan meshiti men Astana jastary eriktiler toby da ún qosyp otyr.

«Qaıyrymdylyq sharany batamen ashqan Bas múftı syn saǵatta kópshilikti úlgi bolýǵa shaqyryp, eriktilerdiń eńbegine rızashylyǵyn bildirdi. Osylaısha, Naýryzbaı qajy Taǵanuly ózi bastap, bólingen azyq-túlikti muqtaj otbasylarǵa tabystap Naýryz merekesimen quttyqtady. Óz kezeginde qajetti azyq-túlikke qol jetkizgen jandar alǵysyn jaýdyryp jatty», - delingen taratylǵan aqparatta.

Aıta keteıik, mundaı ıgi shara koronavırýsqa baılanysty karantın jarııalanǵan elimizdiń eki iri qalasynda jalǵasyp jatyr.