Bas múftı: Aýyzashardy úıde berý men qorjynǵa salyp jetkizýdiń saýaby birdeı
«Oraza kezinde bárimiz Taraýyqqa, aýyzasharǵa úırenip qaldyq. Ókinishke qaraı, Alla Taǵala bizge osyndaı kezeńdi kórýdi jazypty. Endi bul kezeńnen de saqtyqpen, aqylmen, mádenıettilikpen ótýimiz kerek. Qazir qolymyzdan kelgenshe «oraza qorjyny» degen atpen aýyzashar berý tártibin nasıhattap jatyrmyz. Elimizdiń birqatar óńiri qyzyl aımaqqa ótip, sary aımaqta da birneshe óńir bar. Sondyqtan saqtyq sharasyna nazar aýdaryp, oraza aýyzashardy barynsha jetkizip berý arqyly ótkizsek dep otyrmyz. Bul bir-birimizge degen qurmetimiz bolady», - dedi Naýryzbaı qajy Taǵanuly Ortalyq kommýnıkatsııalar qyzmetindegi brıfıng barysynda.
Bas múftı aýyzashardy jetkizip berý men úıde ne dámhanada aýyzashar berýdiń saýaby birdeı ekendigin basa aıtty.
«Siz úıde nemese ashanada aýyzashar berseńiz de, aýyzashardy qorjynǵa salyp, aýyz bekitken janǵa jetkizip berseńiz de saýaby birdeı bolady. Aýyzashar berý súnnet, saýapty amal. Mindettelgen amal emes. Al adamnyń ómirin saqtaý, qorǵaý bizge buıyrylǵan mindetti amal sanalady», - dedi Bas múftı.