Bas qalaǵa Astana ataýyn qaıtarý boıynsha qoǵamdyq tyńdaý ótti
Tilderdi damytý jáne arhıv isi basqarmasynyń basshysy Sáken Esirkep qatysýshylardy áleýmettik jelilerde jáne qoǵamda talqylanyp jatqan depýtattar usynysyn qoldaýǵa shaqyrdy.
Óz kezeginde Qoǵamdyq keńes músheleri elordaǵa burynǵy ataýyn qaıtarýdy qoldady. Olardyń pikirinshe, bas shaharǵa Astana ataýyn qaıtarý usynysyn eskerý – bılik pen halyq arasyndaǵy ózara qarym-qatynasty, halyq únine qulaq asatyn memleket tujyrymdamasynyń iske asyp jatqanyn aıǵaqtaıdy.
«Tuńǵysh Prezıdent Nursultan Nazarbaevtyń memlekettiń qalyptasýy jolyndaǵy róli aıryqsha. Biz birinshi Prezıdentke rızamyz, biraq ataýdy ózgertý isi asyǵys sheshim boldy. Onomastıkalyq komıssııa Astana dep ataý týraly bizdiń usynysymyzdy zerdelep, ol talaptarǵa saı keledi jáne eń bastysy, qoǵamdy biriktirýge múmkindik beredi dep qorytyndy shyǵardy», - dedi Memleket tarıhy ınstıtýty dırektorynyń orynbasary Búrkitbaı Aıaǵan.
Máslıhat hatshysy Erlan Kanalımov málimetinshe, elordaǵa Astana ataýyn qaıtarý birneshe kezeńnen ótýi tıis. Bastapqyda másele qoǵamdyq tyńdaýlar men máslıhattyń kezekten tys sessııasynda qaralady.
«Osy otyrystar nátıjesinde maquldanǵan nemese maquldanbaǵan sheshimderge sáıkes, respýblıkalyq onomastıkalyq komıssııa otyrysy bolady. Odan soń qujattar Úkimetke jiberiledi. Úkimet Prezıdenttiń qol qoıýy úshin Jarlyq jobasyn jasaıdy. Tek Jarlyq resmı túrde shyǵyp, oǵan qol qoıylǵan soń elordanyń tolyq ataýy ózgeredi dep aıtýǵa bolady», - dep túsindirdi Erlan Kanalımov.
Sonymen qatar máslıhat hatshysy elorda ataýyn ózgertýge qatysty shyǵyndarǵa túsinik bergen bolatyn. Onyń aıtýynsha, tsıfrlyq qujat aınalymyna kóship jatqanymyzdy eskersek, onda shyǵyndar az bolady.