Bas qala mańyndaǵy eldi mekenderdi kórkeıtý qajet - Memleket basshysy

ASTANA. QazAqparat - Úkimet Astananyń, Aqmola jáne Qaraǵandy oblystarynyń ákimdikterimen birlesip, elorda aglomeratsııasyn damytýdy oılastyrýy kerek. Bul týraly Memleket basshysy Qasym-Jomart Toqaev Elordany damytý máseleleri jóninde keńeste aıtty, dep habarlaıdy QazAqparat Aqordanyń baspasóz qyzmetine silteme jasap.

«Úkimet Astananyń, Aqmola jáne Qaraǵandy oblystarynyń ákimdikterimen birlesip, elorda aglomeratsııasyn damytýdy oılastyrýy kerek. Arnaıy qujat qabyldaý qajet. Onda turǵyndardyń pikiri jáne qalaǵa qatysty máseleniń bári eskerilýge tıis.
Sondaı-aq Astananyń, jaqyn mańdaǵy oblystardyń ákimdikteri, máslıhattary jáne qoǵamdyq keńesteri arasynda ózara tıimdi qatynas ornatý mańyzdy. Elorda jáne onyń tóńireginde ornalasqan eldi mekender birkelki damýy kerek. Olardyń arasynda kóp aıyrmashylyq bolmaýǵa tıis. Sol úshin naqty sharalar qabyldaǵan jón. Bul, ásirese, áleýmettik salaǵa qatysty másele. Bir sózben aıtqanda, bas qala mańyndaǵy eldi mekenderdi kórkeıtý qajet. Olar ómir súrýge barynsha qolaıly bolýǵa tıis.
Elordany damytýǵa qatysty barlyq máseleni jan-jaqty oılastyryp sheshý mańyzdy. Ol úshin «Astananyń mártebesi týraly» zańǵa shuǵyl túrde tıisti ózgerister engizý qajet. Zań arqyly ákimdiktiń quzyreti men jaýapkershiligin kúsheıtý kerek.

Astana turaqty damý úshin ony tıimdi ári sapaly basqarý qajet. Jalpy, Astanany órkendetý úshin, eń aldymen, ákimdik, kásipkerler jáne turǵyndar arasynda senimdi seriktestik ornatý qajet. Basty mindet – árbir azamattyń turmys sapasyn jaqsartý. Osyny durys túsingen jón», - dedi Memleket basshysy.

Sondaı-aq, Prezıdent Astanany damytý jóninde berilgen tapsyrmalar der kezinde ári sapaly oryndalýy keregin eskertti.
«Eń aldymen, búgin aıtylǵan mindetterdi der kezinde ári sapaly oryndaý kerek. Astana bas qala degen ataýǵa laıyq bolýǵa tıis. Astana kórkeıse, búkil elimizdiń eńsesi bıik bolady.
Astana Ádiletti Qazaqstandy qurý jolynda túbegeıli ózgeristerge uıytqy bolýy kerek. Jalpy, qalanyń kúndelikti tynys-tirshiligi udaıy nazarda bolýǵa tıis.
Ákimge qalanyń ahýalyn jaqsy jaǵyna qaraı ózgertý úshin bir jyl ýaqyt beremin. Sizdiń jumysyńyz meniń baqylaýymda bolady. Barlyq qajetti kómekti kórsetemiz. Biraq jumystyń negizgi ózegi – sizdiń qolyńyzda. Tabys tileımin», - dep túıdi sózin Memleket basshysy.