Bas bankır Qazaqstan bankterin zaman talabyna beıimdeýge ýáde berdi

ALMATY. QazAqparat  - Almatyda ótip jatqan qarjygerler kongresinde QR Ulttyq bankiniń tóraǵasy Danııar Aqyshev bankterge qoıylatyn zamanaýı talaptardy atady, dep habarlaıdy QazAqparat tilshisi.

«Ekonomıkanyń durys damýy bankterdiń qarjylyq turaqtylyǵyna tikeleı baılanysty. Osy oraıda biz bankterdi zaman talabyna beıimdeý jumystaryn qolǵa aldyq. 2 jylda 5 banktiń lıtsenzııasy qaıtaryldy. Buǵan korporatıvtik standarttary tómen jáne táýekelderdi basqarý júıesi álsiz bankter ilikti. Sonymen qatar, kóp bankter ózara baılanystaǵy tulǵalarǵa qaryz bergeni, qarjylyq esepterdi jalǵan etip kórsetkeni úshin qarjy júıesinen shyǵaryldy», - dedi bas bankır.

D. Aqyshev Kazkommertsbank bankiniń saýyqtyrý protsesi bastalǵanyn, onyń Halyq bankine qosylǵanyn aıtyp ótti. Osynyń nátıjesinde tek Qazaqstan emes, TMD kóleminde básekege qailetti qarjy ınstıtýty paıda boldy.

«Ulttyq bank bank sektorynyń turaqtylyǵyn arttyratyn keshendi baǵdarlama qurdy. Basty maqsat - bankterdi aktsıonerlerdiń qarjysyn tarta otyryp saýyqtyrý. Bul óz kezeginde birneshe jyl stagnatsııada turyp qalǵan bıznesti nesıelendirýdiń qaıta jandanýy septigin tıgizbek. Saý bankterdiń ekonomıkany nesıemen qamtýynyń kólemi 7 paıyzǵa artqan», - dedi ol.

Onyń aıtýynsha, osy baǵytta birneshe jumys atqarylyp jatyr. Onyń biri - aldyn ala sheship alýǵa bolmaıtyn jınaq shottary ashylǵanyn, halyqtyń bankterdegi jınaqtaryna maksımaldy mólsherleme qoıylǵanyn atap ótti.

«Salymdardyń bárine ortaq sharttar endi ózgerdi. 1 qazannan bastap salymdarǵa merzimi, túri, tolyqtyrý quqyǵyna qaraı maksımaldy mólsherleme qoıylady», - dedi ol.

Ulttyq bank bankterdi baqylaýda 2019 jyldyń 1 qańtarynan bastap jańa júıege kóshti.
«Endi biz problemalyq bankterdi retteý (Recovery and Resolution tools) júıesine kóship jatyrmyz. Bul júıege sáıkes nashar bankter májbúrli túrde taratylady. Bul jańashyldyqtar halyqaralyq tájirıbede óte jaqsy baǵa aldy», - dedi ol.
Bas bankırdiń aıtýynsha, talqylaý ınstıtýtynyń ashylýy qarjylyq uıymdardaǵy alǵashqy problemalardy anyqtaýǵa, ınvestorlardyń quqyǵy men múddesin qorǵaýǵa baǵyttalǵan.
Tólem qabilettiligi nashar bankterdi anyqtaý rejimi jetildiriletin bolady.
«Áńgime, bank aktıvteriniń sapasyn jan-jaqty baǵalaý týraly. Bizdiń oıymyzsha bul rásim tek bankterdiń ózine qajet nárse. Táýelsiz baǵalaý ınvestorlardyń qarjylyq ınstıtýttarǵa senimin arttyrady», - dedi Aqyshev.
Aıta ketý kerek, búgin Almatyda Qazaqstan qarjygerleriniń VIII kongresi bastaldy. Mańyzdy jıyn tól teńgemizdiń dúnıege kelgenine 25 jyl tolýyna oraı uıymdastyrylyp otyr.